Politiit ulloq unnuarlu qaqutigoortumik eqqissisimaffiusimasoq nalunaarutigaat

Ullormi kingullermi angerlarsimaffimmi eqqissiviilliortoqarneranik nalunaarutigineqartoq ataasinnaasimavoq, paasinarsillunilu annikitsuinnarmik isumaqatigiingissuteqartoqarsimasoq.

Kalaallit Nunaanni Politiit ulloq unnuarlu eqqissisimaffiulluartoq misigisimavaat.

Pigaartut pisortaata Julie Senderovitz Bendtsenip oqaatigaa, angerlarsimaffimmi eqqissiviilliortoqarneranik ataasiinnarmik nalunaaruteqartoqarsimasoq, ullullu 14-it matuma siornanut sanilliullugu eqqissiviilliorsimanerit ikilingaatsiarsimasut oqaatigaa.

Kalaallit Nunaanni Politiit ullut 14-it matuma siornatigut, tassa sisamanngornermiit tallimanngornermut, angerlarsimaffinni eqqissiviilliortut pillugit naluaarutit 14-it tiguneqarsimavaat – ullormi kingullermi nalunaarutigineqartumit 13-inik amerlanerusut.

Pigaartut pisortaata ilanngullugu ilisimatitsissutigaa, nalunaarutigineqarsimasoq taanna ataaseq susoqarsimanngitsutut oqaatigineqarsinnaasoq.

Meeraq nipituuliortoq nalunaaruteqarnermut pissutaasimasoq

Meeraq kamallunilu nipituuliortoq nalunaaruteqarnermut pissutaasimavoq. Ilaqutariit najugarisaminni ajunngillat, angajoqqaallu aalakooratik, pigaartut pisortaat oqaluttuarpoq. Pigartut pisortaata oqaatigaa, meeqqat angajoqqaallu akunnerminni isumaqatigiinnginnerisa nalunaarutigineqartarnerat nalinginnaasuusoq.

Nalinginnaasumik imigassartorsimanermut atatillugu suliassat politiit ulluinnarni sulineranni initusaqaat. Tamatuma saniatigut innuttaasorpassuit juullilersoq kingullermik aningaasarsimammatali, taakkununnga piffissap immikkut ittumik sivisusimavoq.

Avannaata Kommuniani imigassamik tunisaqartarneq suli ammavoq. Politiillu annikittunnguanik suliassaqarsimapput, ilungersunanngittunilli, pigaartut pisortaat oqaluttuarpoq.

Powered by Labrador CMS