Skip to main content

Politiit ulapingaatsiartut: Imigassartorsimalluni ATV-nik ingerlatsisoq allallu tillinniartoq

Politiit sapaatip akunnerata naanerani ulapingaatsiarsimapput. Tasiilami politiit imigassartorsimalluni ATV'rtumik unitsitsiniaasariaqarsimapput, Nuummilu politiit tillinniarniarsimasumik ujaasisimallutik.

Kalaallit Nunaata Politiivi sapaatip akunnerata naanerani ulapingaatsiarsimapput.

Angerlarsimaffimmi eqqissiviilliortitsinerit, aalakoortut, aqqusinermi perulluliortut, imigassartorsimallutik biilinik ingerlatsisut, tillinniartut aserorterinerillu arlallit nuna tamakkerlugu politiinit orninneqartariaqartarsimapput.

Sulialli nalinginnaavallaanngitsut aamma politiinit suliarineqarsimapput.

Imigassartorsimalluni ATV-nik ingerlatsisoq

Arfininngornerup ullaassaani nalunaaqutaq 05.51 politiinut nalunaarutigineqarpoq angut inuusuttoq ATV-nik ingerlatsisoq aqunnera eqqumiissinnaasoq. Innuttaasup maluginninniaasup eqqumiigalugu politiinut nalunaarutigisimavaa.

Tasiilami politiit biilerlutik takunniffiup tungaanut alakkaapput. Angut ATV-nik ingerlatsisoq unitsippaat, politeerlu ataaseq biilinit niulluni ATV-nik qamitsiartorpoq.

- Angut inuusuttoq 15-inik ukioqartuuvoq. Paasileramiullu politiinit unitsinneqarluni, politiip ATV-t qaminnialissagaalu ATV-nik aallarsaqqippoq. Taamaasinerani politeeq kalitsitallappoq, ajoquseranili, Kalaallit Nunaata Politiivini pigaartut pisortaat Julie Senderovitz Bendtsen Sermitsiaq.AG-mut oqaluttuarpoq.

Malersuineq sivikitsoq

Politiit ATV-nik ingerlatsisoq malissallugu aamma aallarput.

- ATV politiit biiliisa biilillu allat akornannut kiggitsillugit iluatsissimavaat, angulli inuusuttoq ajoqusernagu. Angut inuusuttoq ATV-nit niusitaagami qimaariarsimagaluarpoq. Attertumulli aqqutaani politiinit tigusarineqarluni, pigaartut pisortaat oqaluttuarpoq.

15-inik ukiulik aaversippoq, imigassartorsimaneranut uppernarsaataasussamik pisunullu assigiinngitsunut tallimanut pasineqarluni unnerluunneqarluni. Pigaartut pisortaata ilisimatitsissutigaa angut inuusuttoq pisup siuliani politiinit ilisarisimaneqartuunngitsoq.

Theop tillinniaq tiguaa

Arktisk Kommandop illuutaasa ilaanni Nuummiittumi tillinniartoqarmat politiit qimmiat Theo aamma iluaqutaalluarpoq.

- Arfininngornerup ullaassaani nalunaaqutaq 05.54 Arktisk Kommandomit nalunaarfigineqarpugut illuutaasa ilaanni tillinniariartoqarsimagaluartoq. Biilit ingerlaartugut erngerlutik ornigupput, minutsillu iluanni apuutereerlutik. Paasivarput igalaaq qaqortoq ataaseq sinaatigut sequmillugu ammarneqarsimasoq, illulli iluaniittoqanngitsoq, Julie Senderovitz Bendtsen Sermitsiaq.AG-mut ilisimatitsivoq.

Politiit biilii allat, politiit qimmiat Theo peqatigalugu aamma ornigupput. Piffissami tassani politiit ilaasa maluginiarpaat Arktisk Kommandomit 100 miiterisut ungasissusilimmiittumiit angut arpalluni qummukartoq. Politiit angut arpattoq biilerlutik Nuukullaap tungaanut malippaat, taannali nassuiaatissaqarsimavoq sooq Arktisk Kommandop ungasinngisaanniissimalluni.

Grønlands Politis politihund Theo.
Grønlands Politi

- Taamaattumik Theo Arktisk Kommandomiit kuniuitilerparput. Theop erngerluni tillinniap tipaa nanivaa, paasinarsivorlu angut sumiiffimmit qummut arpattoq tassaasoq tillinniaq. Taanna tillinniarsimasutut maanna pasineqarpoq, naatsorsuutigineqarsinnaavorlu eqqartuussivimmi sassartinneqarumaartoq, Julie Senderovitz Bendtsen oqaluttuarpoq, oqarlunilu politiit qimmiata Theop kuubeeq igalaanut ammaataasimasoq aamma nassaarisimagaa.

- Kuubeeq nuumigut qaqortummik qalipaammik kigarneqalersimavoq. Taannalu soorunami tiguarput, aamma DNA-qarnersoq misissussavarput ilimatsaassarput ilumoornersoq qulakkeerumallugu, pigaartut pisortaat ilisimatitsivoq.

Tillinniaq illup iluaneersunit tigusaqarnissaminut angumersisimanngitsoq aamma ilisimatitsissutigineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER