Politiit toqungasup kinaassusaa paasisinnaangajaleraat
Ilulissani toqungasup timaata ilaanik nassaartoqareersorlu ulluni arlalinni annertuumik misissuisoqarpoq. Maanna toqungasup kinaanera paasineqarsinnaangajalersoq, politiit oqaluttuaraat.
Ilulissani ikuallaavimmi toqungasup timaata ilaanik nassaarnerup kingorna toqungasup kinaanera paasineqangajalersoq politiit pinerluttoqarsimaneranik paasiniaasartuisa pisortaat Jan Lambertsenip tusagassiortunik katersortitsinermi pingasunngornermioqaatigaa.
Kinaassusersivinneqarnissaanut suli misissugassat arlaqartut politiit paasissutissiissutigaat. Pinerluttoqarsimaneranik paasiniaasartut pisortaat toqungasup kinaanerata ilisarineqarsinnaaneranut sorpiaat isumalluartitsinersut annertunerusumik itisilerusunngikkallarpaa.
Toqungasoq kinaassusersineqarpat misissuineq annertuumik siuariassasoq politiit oqaatigaat. Toqutsisimanermut najoqqutassat kikkullu pinerluttuunersut paasineqarsinnaanngoriaanaalluni.
Suli politiit pasisaqanngitsut Jan Lambertsen tusagassiortunik katersortitsinermi oqaatigaa.
Paasissutissanik suli ujaasineq
Pinerluttoqarsimatillugu paasiniaasartut misissuinerisa saniatigut toqungasup kinaassusaa paasineqarpat Ilulissani innuttaasut toqqissiallannissaat naatsorsuutigineqarpoq.
Toqungasoq kinaassuserneqarpat suliaq 'nalaatsortumik pisimasutut' suliarineqarunnaarnissaa, pisortap neriuutigaa.
Siusinnerusukkut politiit innuttaasunut ikiortissarsiornikuupput. Maanna suli innuttaasut arlaanik eqqaasassaqarunik politiinut saaffiginneqaqquneqarput.