Politiit timmisartup ajornartorsiulernerata kingorna kalerrisaarummik atuisarneq oqaluusererusukkaat
Nittartakkani inuit attaveqatigiittarfiini isornartorsiuisoqarnerata kingorna politiit oqartussanik allanik peqateqarlutik isumannaallisaanermi timmisartut minnerinut atatillugu kalerrisaarummik atuisarneq nalilersuiffiginiarpaat.
Sapaammi ullaakkut nalunaaqutaq 07.41 illoqarfimmi kalerrisaarut aallartimmat tamanna Nuummi innuttaasut akornanni eqqissiveerussutigineqarpoq.
Tamatuma peqatigisaanik kalerrisaarutip aallartinneqarneranut suna pissutaanersoq aamma paatsuungassutigineqarpoq. Politiit nalunaaqutaq qulingiluat missaanni Facebookimi ilisimatitsipput, kalerrisaarut aallartinneqarsimasoq, timmisartoq motooriminik ajornartorsiuteqarluni Nuummut ingerlasariaqalersimammat.
Innuttaasut arlallit pisoq pissutigalugu illoqarfiup ilarujussuata kalerrisaarummik aallartitsivigineqarsimanera Facebookimi eqqumiiginninnerminnik ersersitsissutigaat. Mittarfeqarfiit kingusinnerusukkut paasissutissiipput, mittarfimmi napasuliami pigaartuusup kalerrisaarut aallartissimagaa oqartussat attuumassuteqartut kalerrinniarlugit upalungaarsimasullu timmisartup minnissaanut atatillugu mittarfiliartissinnaajumallugit.
Politiit pisup ingerlasimanera maanna misissuiffiginialerpaat:
Suleriaaseq misissorniarparput
- Kalaallit Nunaanni Politiit pisup ingerlasimanerata misissuiffiginera suleriaatsillu atorneqartup misissorneqarnera maanna aallartippaat.
- Tamatumunnga atatillugu sapaatip-akunnerata tulliata aallartinnerani suleqatit attuumassuteqartut ataatsimeeqatiginiarpavut, tamatumanilu mittarfimmi isumannaallisaanermi mittoqarneranut atatillugu oqartussanik kalerrisaarisaarnermi suleriaatsip nutarterneqarnissaanut periarsiaaq eqqartorlugillu misissuataarniarpavut, Kalaallit Nunaanni Politiit tusagassiuutitigut nalunaarummi allapput.
Politiinit innuttaasut nittartakkani inuit attaveqatigiittarfiini qisuariaataat eqqumaffigineqarput:
- Ajunaarnersuaqarnerani kalerrisaarutip/nilliasaatip Nuummi innuttaasut akornanni toqqissisimannginnermik pilersitsisimanera eqqumaffigaarput. Tamanna Facebookimi allaaserisatsinni oqaaseqaatini takusinnaavarput.
Illup iluanut iseriarluni KNR tusarnaarneqartussaavoq
- Taamaattumik ajunaarnersuaqarnerani kalerrisaarut mittarfimmi isumannaallisaanermut atatillugu mittoqarnerani aallartinneqassappat allanneqareersimasunik pilertortumik Facebookimi quppernitsinni ikkussinnaasatsinnik periarfissanik misissuisimavugut, politiit allapput.
Politiinit erseqqissaatigineqarpoq, ajunaarnersuaqartillugu kalerrisaarummik/nilliasaammik aallartitsisoqarpat aamma aallartitsisoqassappat suleriaaseq innuttaasunullu kajumissaarut maannamut atuuttoq suli atuuttuusoq:
- Illup iluanut iserit, matut igalaallu matukkit. Radio/TV ikikkit, ajunaarnersuaqartillugu kalerrisaarummut/nilliasaammut atasumik nalinginnaasumik upalungaarsimanissaq pillugu nalunaaruteqartoqartussaammat.