Politiit timip ilaanik suli ujaasisut

Politiit Ilulissat ikuallaaviata eqqaani inuup timaata ilai nassaarineqartut malillugit, toqungasup kinaanera erseqqissumik qanittukkut paasisaqarfigissallugu neriuutigaat.

Politiit suliap killiffia pillugu tallimanngornermi ilisimatitsissutigaat, suna toqussutaasimanersoq oqaatigineqarsinnaassagunartoq.

- Pissusissamisoortumik apeqqutigineqartorpassuit toqusimasut timaannik misissuisartup erseqqissumik oqaluttuuteriarpatigut akissutissarsinissaat naatsorsuutigaarput. Assersuutigalugu suna toqussutaasimanersoq oqaatigisinnaassagunarparput, vicepolitiinspektøri Jan Lambertsen tusagassiorfinnut nalunaaruteqarnermi oqarpoq.

Politiit siusinnerusukkut oqaatiginikuuaat, suliaq toqutsisoqarsimasutut misissuiffigineqartoq.

Ikuallaaviup eqqani misissueqqissaarneq kommunimi upalungaarsimasut ikiortigalugit suli ingerlanneqarpoq. Sulineq sapaatip akunnera naallugu ingerlanneqassaaq, ataasinngorpallu naammassineqarsimassasoq naatsorsuutigineqarluni.

- Timip ilivitsup ilineqarnissaa pingaaruteqartoq

- Qaterisartut ikiortigilluarlugit ikuallaaviup eqqaani uppernarsaataasinnaasunik misissueqqissaarluta suli ingerlatsivugut. Nunaminertaq misissuiffigisarput angisuujuinnanngilaq, aammali eqqakkat sukumiilluinnartumik misissuiffigineqarnerat annertoqaaq, vicepolitiinspektøri misissuisartullu pisortaat Jan Lambersen oqarpoq.

Politiit maanna takussutaasinnaasuni immikkuualuttut, tassunga ilanngullugu timip sortai nassaarineqarsimanersut oqaatigerusunngilaat. Jan Lambertsenip oqaatigaa, ileqqorissaarnissaq eqqarsaatigalugu timip ilaanik suli ujaasisoqassasoq. Tamanna misissuinermut aalajangiisuunngikkaluartoq:

- Uagutsinnut pingaaruteqarpoq, timip ilivitsuusup naggataatigut ilineqarnissaa. Timi ilivitsoq piginngikkaluarlugu misissuisinnaavugut, aamma inuttut misigissutsit ileqqorissaarnissarlu eqqarsaatigineqartariaqarput, Jan Lambertsen oqarpoq.

Innuttaasut suliami paasissutissaateqarsorigunik politiinut suli saaffiginnittarnissaannik kaammattorneqarput. Suliaq amiilaarnartoq sapaatip akunnerata naanerata siuliani arfinginngornikkut aallartinneqarpoq, taamanikkut sulisoq ataaseq inuup timaata ilaanik ikuallaavimmi nassaarmat. Kingusinnerusukkut timip ilaanik allamik aamma nassaartoqarpoq.

Pisoq illoqarfimmi innuttaasunit malugineqarsimaqaaq, ullumilu dronningip tikinnerani nuannaartoqarnissaraluanut akornutaassagunarluni.