Nuummi GU-mut sioorasaarineq
Politiit tigusarinninniarlutik iliuuseqaqqipput
Arfininngormat ullaap tungaani Nuummi politiit angut, tallimanngormat ualikkut ilinniarnertuungorniarfimmut sioorasaarisoq, suli tigusarinngilaat
Nuummi politiit maanna sinerissamit Danmarkimillu ikiortissarsiorput, angutip tallimanngormat ilinniarnertuunngorniarfimmik sioorasaarisimasup tigusariniarnissaanut.
– Kongevejimi assersugarput annertuseqqammerparput, Kalaallit Nunaanni Politiini stabschef Lars Kirkegaard arfininngormat ullaap tungaani politeeqarfimmi tusagassiortunik katersortitsinermi oqaluttuarpoq.
Assersukkamut ilanngunneqarput Aqqusinersuup aamma Qatserisut naapiffiat aammalu Dronning Ingridsvejip Jagtvejillu T-tut naapiffiat. Aammalu Kongevejimi Ceresvejimilu assersuisoqassaaq.
Iliuuseqarnikkut aamma Nuummi bussit eqqorneqarput.
Politiit annertuumik iliuuseqartut
Nuup illoqarfiata qeqqa tallimanngormat ualikkut pisarnermit politiit biileqarnerujussuuvoq, illoqarfimmi ilinniarnertuunngorniarfimmi ilinniartuusimasup sioorasaarinerata kingunerisaanik.
Politiit tallimanngormat aalajangerput Kongevej 11-p eqqaa assersorniarlugu, angut tassani toqqorsimasorineqarmat.
GU sioorasaarneqarpoq
Unnuup ilarujussuani politiit, pinartoqartillugu politiit iliuuseqartartui ikiortigalugit, angut tunniutiinnartinniaraluaraat. Sulili tamanna iluatsinngilaq.
Illoqarfimmi ilinniarnertuunngorniarfik tallimanngormat sioorasaariffigineqarpoq, politiilli sioorasaarut suunersoq suli oqaatigiumanngilaat.
Taamaasilluni ilinniarnertuunngorniarfimmi tusarfimmit oqaatigineqarpoq pisimasoq pissutigalugu ukiumoortumik festernissaq kinguartinneqartoq.
Nassuiaateqanngillat
Tallimanngormat ualikkulli tusatsiarneqartalerpoq angut, politiit oqaatigisaat siusinnerusukkut tarnikkut ajornartorsiuteqarsimasoq, sunik sioorasaaruteqarsimanersoq.
Politiilli suli oqaaseqarumavallaanngillat.
Tusatsiarparput aallaasersornissamik sioorasaarisimasoq. Tamanna uppernarsarsinnaavisiuk?
– Naamik, eqqornerutipparput sunik sioorasaarisimanerata suli oqaluttuarinnginnissaa, politiini stabschef arfininngormat ullaap tungaani tusagassiortunik katersortitsinermi oqarpoq.
Isumassuisut
Politiit ilanngullugu oqaatigaat angutip tigusariniarnerani inuit manna tikillugu suleqatigiikkusussimasut, aammalu sioorasaarneqartut, angullu sioorasaarisimasoq, isumakuluffigigaat.