Politiit takunnissimasunik ujaasipput: Toqungasup timaata ilaa nassaarineqartoq
Ilulissani ikuallaaviup eqqaani maanna politiit annertunerusumik misissuileruttorput. Toqungasup timaata ilaanik nassaartoqarsimasoq politiit maanna paasissutissiipput.
- Ullaap tungaa tusagassiuutinut nalunaarutitsinni pasinarsinnaasumik Ilulissani ikuallaaviup eqqaani nassaartoqarsimasoq paasissutissiissutigaarput.
- Maanna nalunaarutigisinnaavarput toqungasup timaata ilaanik nassaartoqarsimasoq. Taamaammat ajortuliortoqarsimasinnaanera ilimanaateqarsinnaavoq. Misissuinerpullu toqutsisoqarsimatillugu misissuinertut ingerlavoq, politiit paasissutissiipput.
Ikuallaavik suli matoqqatinneqarpoq, Ilulissanilu politiit Nuummi misissuisartunik ikiorneqassapput. Danmarkimiillu aamma ikiortissarsiortoqaleruttorluni.
- Suliaq taama annertutigitillugu Rigspolitiinut pinerlussimanermik paasiniaavianni ikiortissanik qinnuteqarpugut.
Ilulissani inummik maqaasisoqartoqanngilaq
Politiit inunnik maqaasineqartunik suli ilisimasaqarnatik naqissuserpaat. Taamaammallu politiit innuttaasunit ikioqqupput.
- Innuttaasut sapaatip akunnerata ingerlanerani attavigineqarsinnaasimanngitsut immikkut soqutigisaqarfigaagut.
Suliaq pillugu politiinut paasissutissaqaruit Kalaallit Nunaanni politiit oqarasuaataanut 70 1448-imut saaffiginneqquneqarputit. Politiit taama tusagassiuutinut nalunaarummi allapput.
Misissuineq toqungasullu timaata ilaanik nassaarsimanerup saniatigut politiit misissuisoqarnerani allanik paasissutissiisinnaanatik erseqqissaatigaat.