Politiit sukkanerusunik angallateqalerput
Kalaallit Nunaanni Politiit angallatinik sukkanerusunik pingasunik peqalerput, taamaasillutik inuit imaani navialisut sukkanerusumik nassaarisinnaalissallugit. Imigassartorsimasutullu imaatigut angalasutut pasineqartut aamma qisuariarfigineqarsinnaalissapput.
Kalaallit Nunaanni politiit sisamanik maanna angallateqarput, angallatillu taakku ilaat pingasut nutaaliaanerusunik taarserneqassallutik.
- Angallatit nutaat, angallallu pitsaaneq atorlugit, inuit imaatigut navialisut Kalaallit Nunaanni Politiinit ikiorneqapallassinnaalissapput. Nunaqarfinnullu sumiiffinnilu politeeqarfeqarfinngitsunut pisariaqartitsisoqartillugu tikipallassinnaalissalluta, politimester Bjørn Tegner Bay tusagassiutinut nalunaarummi ilisimatitsivoq.
Politeeqarfiit angalasinnaasut
Taassuma ilanngullugu nalunaarutigaa angallatit politeeqarfittut aamma atorneqarsinnaasut, pisariaqartitsinermilu nunaqarfimmiit nunaqarfimmut ingerlanneqapallassinnaasassallutik.
- Paasisimavarput imigassartorsimallutik imaatigut angalasoqartartoq, siornatigut qisuariarfigisinnaasarsimanngilagut. Angallatit nutaat atorlugit tamanna allanngortissavarput, politimesteri erseqqissaavoq.
Tasiilaq ilanngullugu politiit angallataannik peqartinneqalissaaq.