Politiit stressimik isumatsassimanermillu ajornartorsiuteqartut
Ukiuni kingullerni pisartut sakkortuut sulineq oqimaannerulersissimavaat.
Folketingimi ilaasortap Aaja Chemnitz Larsenip (IA), politiit isertitsivinnilu sulisut peqqissusaat ernumagai. Ernummateqarneranut tunngaviuvoq nalunaarusiaq nutaaq, tassani politiit isertitsivinnilu sulisut tarnikkut qanoq artukkerneqartartiginerat allaaserineqarpoq. Ajorluinnartumillu inissisimasoqarpasilluni. Atugarliortut amerlannguatsiaqaat.
Aviisi AG allappoq.
– Nalunaarusiami takuneqarsinnaavoq, Kalaallit Nunaanni politiit 15 procentii stressertut, 10 procentiilu annertuumik PTSD-qartut. Tamatuma saniatigut Kalaallit Nunaanni isertitsivinni sulisut 33 procentii stresserput, 25 procentingajaallu annertuumik PTSD-qarlutik, Aaja Chemnitz Larsen Danmarkimi inatsisinik atuutsitsinermut ministerimut Nick Hækkerupimu saaffiginnilluni allassimavoq.
Sorsuttuniissimanermit kingunerluutit
PTSD nappaataavoq sorsuttuniissimanermit kingunerlutsitsinermut atatillugu taaneqakkajuttoq, aammali nappaat sakkutuujunngitsunit atorneqartarpoq. PTSD nappaammut posttraumatisk stress disorderimut naalisaataavoq.
Aaja Chemnitz Larsenimit Danmarkimi naalakkersuisut kaammattorneqarput, suliffeqarfinni taakkunani sulisut ikorfartorniarlugit iliuusissanik pilersaarusioqqullugit.
– Politiit apersorneqarsimasut oqaatigaat, sulineq ukiuni kingullerni tarnikkut oqimaalliartorsimasoq, peqqarniitsunik arlalinik pisoqartarneratigut, Aaja allappoq.
Ilanngutassiaq tamaat AG-mi atuaruk - ugguuna iserfigisinnaavat: