Politiit pillugit maalaarutit Danmarkimi suliarineqartalissapput
Kalaallit Nunaata Politiivini atorfeqartut pillugit maalaarutit 1. januar aallarnerfigalugu Danmarkimi Maalaaruteqartarfimmut Attuumassuteqanngitsumik Oqartussaaffimmit suliarineqartalerput. Suliassat 23-t 2022-mi tunniunneqarsimasut nuunneqareerput.
Kalaallit Nunaanni Politiit nammineq sulisutik pillugit maalaarutinik suliaqartarunnaarput.
Taarsiullugu maalaarutit tunniunneqartut Politiit pillugit Maalaaruteqartarfimmut Attuumassuteqanngitsumik Oqartussaaffimmit 1. januar 2023 aallarnerfigalugu suliarineqartalerput.
Tamanna isumaqarpoq politini atorfeqartut pillugit isornartorsiusoqassanersoq, eqqartuussivimmut tunniussisoqassanersoq suliamilluunniit unitsitsiinnartoqassanersoq pillugu politit pisortaat aalajangiisarunnaassasoq.
- Politiit pillugit maalaaruteqartarfiup suliat akisussaaffigilerpai, taamaalillunilu Kalaallit Nunaanni Politiit politiit immikkoortortaqarfii allat assigalugit, sulisut pissusilersorneri pillugit aamma suliat pinerlunnermut tunngasut politiit pillugit oqartussaaffimmi suliarineqartalerput.
Siunnersuisoqatigiit pilersinneqassapput
Kalaallit Nunaata Politiivi 2022-mi maalaarutinik 23-nik tigusaqarsimapput. Taakkulu Maalaaruteqartarfimmut Attuumassuteqanngitsumik Oqartussaaffimmit suliarineqartussanngorput. Maalaarutit tamarmik tassunga ingerlateqqinneqartalissapput. Maalaarutit politiit pissusilersuutigisimasaannut pinerlunnermulluunniit peqataasimasinnaanissaannut attuumassuteqartarput.
- Politiit pillugit maalaaruteqartarnermut aaqqiissutip allanngortinneqarnissaata – innuttaasuni politiinillu – politiit pillugit maalaarutit suliarineqarnerisa kinaassusersiunngitsumik aamma inatsisitigut illersorneqarsinnaasumik pineqartarnerinut nalinginnaasumik tatiginninnerup qulakkeernissaa siunertaavoq, Kalaallit Nunaanni Politiit Sermitsiaq.AG-mut ilisimatitsipput.
Politiit pillugit maalaaruteqartarfiup sulianik suliarinninneranni najukkami pissutsinik ilisimasaqartoqarnissaa qulakkeerniarlugu, Kalaallit Nunaanni Politiit pillugit maalaarutini immikkut siunnersuisoqatigiinnik pilersitsisoqarpoq. Siunnersuisoqatigiit suliani suliarinninnermi siunnersuillutik oqaaseqaatinik nunatsinni pissutsinut ilisimannittoqarnissaanik qulakkeerinnissapput.
Ikaarsaariarneq politiit sulinerannut sunniuteqassanngitsoq, Kalaallit Nunaanni Politiit ilisimatitsipput.