Politiit pillugit maalaaruteqartarfik siullermeerluni 'ornigulluni' suliassamut Nunatsinnukalerpoq
Politiit pillugit Maalaaruteqartarfik Attaviitsoq Kalaallit Nunaanni siullermeerluni ornigulluni suliassaqalerpoq, tassanilu Tasiilami toqusoqarnera misissuiffigissavaat. Oqartussaaffilli sulianik allanik arlalinni aamma suliaqassaaq, ilaatigut politiit pillugit maalaarutinik, siunnersortit pisortaat oqarpoq.
Arfininngormat arnaq inuusuttoq Tasiilami toquvoq. Politiit najuunneranni tamanna pimmat, pisoq Politiit pillugit Maalaaruteqartarfimmit (DUP) misissuiffigineqassaaq-
Politiit pillugit Maalaaruteqartarfik misissuineq eqqarsaatigalugu suliaq taanna oqaaseqarfigisinnaanngilaat.
DUP-imili siunnersortit pisortaata Christel Stigaardip, suliani taamaattuni Kalaallit Nunaannut suliarineqalersuni siulliusoq oqaatigaa.
- Tikilluta misissuiartussaagut, Christel Stigaard oqarpoq, nangillunilu:
- Tamanna pillugu misissuinermit paasisanik nassuiaasiussaagut, nassuiaallu naalagaaffiup eqqartuussissuserisuanut nassiunneqassaaq, taassumalu iliuuseqartoqassanersoq iliuuseqartoqassannginnersorluunniit aalajangissavaa.
Toqusoqartillugu misissuineq aallartinneqartassaaq
DUP 1. januaarimit Kalaallit Nunaanni Politiit immikkoortortaqarfianni suliaqarnissamut piginnaatinneqalerpoq, oqartussaaffiullu politiit suliaqarneranni toqusoqartillugu sulianik misissuisinnaalernerannik isumaqarpoq. Suliat taamaattut ornigulluni suliassatut taaneqartartut, Christel Stigaard nassuiaavoq:
- Ornigulluni suliani politiit akuliunnerisa kinguneranik imaluunniit paarinninneranni inuk toqusimappat imaluunniit ajoquserujussuarsimappat misissuinermik aallartitsisussaavugut. Tassani pissutsit pillaassutaasinnaanerat apeqqutaatinneqarnani, taanna oqarpoq.
Ornigulluni suliat saniatigut DUP-p aamma politiit pissusilersorneri pillugit maalaarutit aamma suliarisarpaat, kiisalu politiini sulisunit pissutsit pineqaatissiissutaasinnaasut:
- Tassa imaappoq, politiit pissusilersornerat naammagisimaanngikkaanni, pissusilersorneq pillugu maalaarummik DUP-mut tunniussisoqarsinnaavoq. Assersuutigalugu politiit pisumi pissaanermik atuivallaarsimasut isumaqaraanni, imaluunniit politiit ajortumik oqalussimappata, kisianni aamma naleqqutinngitsumik allatut pissusilersortoqarsimappat. Taava uagut piginnaatitaaffitta ataaniissaaq, Christel Stigaard oqarpoq, nangillunilu:
Politiini sulisut pillugit nalunaarutit aamma isumagisaraat
- Aammattaaq politiinit sulisut sulinerup nalaani pineqaatissiissutaasinnaasumik pisoqarneranik nalunaarutiginninnerit suliarinissaannut piginnaatitaalerneqarpugut. Tassa suliat kikkulluunniit nalunaaruteqaatigineqarsinnaasaat. Assersuutigalugu angallannermut inatsimmik, pinerluttulerinermi inatsimmik imaluunniit ikiaroornartut pillugit inatsimmik unioqqutitsinerit.
- Politiit sulinerup nalaani pineqaatissiissutaasinnaasunik pisoqarsimaneranik pasillernermi uagut piginnaatitaavugut.
Politiit pissusilersornerat pillugu maalaarutit aamma politiinik nalunaarutiginninnerit DUP-p nittartagaatigut pisinnaapput. Tamatuma kingorna oqartussaaffiup saaffiginnissutit misissussavai, qanorlu pisoqarnissaa nalilersorlugu.