Politiit oqimaalutaaneq naammassigaat: Hashimik 4 kilo sinnilimmik nassataqarluni unitsinneqartoq
Angut kalaaleq utoqqasaaq, Nuummut tallimanngornermi ualikkut tikinnermini tigusarineqarpoq, nassataani hashimik 4 kilo sinnilimmik nassaartoqarsimammat. Angut eqqartuussivimmi ullumi sassartinneqassaaq, tigummigallarneqarnera sivitsorneqarnissaa pillugu.
Nuummi ilanngaaserisut angut kalaaleq utoqqasaaq hashimik nassataqarluni tikittoq tallimanngornermi ualikkut unitsippaat.
Angut politiinit suli tigummigallarneqarpoq, hashilu eqqunneqartoq maanna kisinneqarsimalerpoq.
Hashi 4.268 gram, Københavnimi Kastrupimiit Nuummut nassatarineqarsimavoq.
- Suliaq politiinit suli misissorneqarpoq, politiini pigaartut pisortaat Carl Sværd Sermitsiaq.AG-mut oqarpoq.
Eqqartuussivimmi sassartinneqassasoq
Politiit Sermitsiaq.AG-mut tallimanngornermi ualikkut ilisimatitsipput angut killisiorneqassasoq suliamilu unnerluutigineqassasoq.
Angut politiinit tallimanngornermi nal. 13.30 missaani tigusarineqarpoq, Nuummut tikinnerup kinguninngua.
- Ilisimatitsissutigisinnaavara pineqartoq eqqartuussivimmi, inatsit tunngaviusoq naapertorlugu ullumi sassatinneqassammat, tigummigallarneqarnerata sivitsornissaa piumasarineqarluni. Ullunik qassinik sivitsuisoqarnissaanik piumasaqarneq maanna oqaatigisinnaanngilara, Carl Sværd oqarpoq.