Skip to main content

Politiit Nuummi ujajaaniarsimasunik ujaasisut

Nuup Nuussuartaani Brugseneeqqami Atertamiittumi angutit inuusuttut marluk qunusaaralutik aningaasanik tillinniaraluarsimasut politiinit ujaarineqarput. Ujajaaniaraluilli taakku marluk aningaasanik suli tunineqaratik qimaasariaqarsimapput.

Brugseneeqqami Nuup Nuussuartaaniittumi ujajaaniarsarisoqartoq pillugu Kalaallit Nunaanni Politiit marlunngornermi ualikkut nalunaaqutaq 16.06 nalunaarfigineqarput.

Overvågningsbillede
Kalaallit Nunaanni Politiit

Politiit Brugseneeqqamut ornigussimapput, tassanilu paasitinneqarlutik inuit marluk kiinnatik asserlugit pisiniarfimmut iserlutik aningaasanik karsimiittunik arnaq sulisoq qunusaarlugu tunniusseqqusimagaat.

Sulili aningaasanik tunineqaratik qimaasariaqarsimapput, politiillu ujajaaniarsimasut taakku marluk nassaariniarlugit ikiortissarsiorput.

Politiit ujajaaniarsimasut taakku marluk saniatigut, inuit suliamut atatillugu ilisimasaqarsinnaasut takunnissimasinnaasulluunniit aamma tusagaqarfigerusuppaat.

Ujaarineqartut

Kalaallit Nunaanni Politiit inuit marluk, takunnissimasut videokkullu nakkutiginninnermi atortoq naapertorlugit imatut isikkullit ujaaraat:

  • Angut 15-it 20-llu akornanni ukiulik. Taanna 165-170 cm-it missaannik angissuseqarpoq, timaa nalinginnaasoq, taartumik amilik kalaallisullu oqaluttoq. Atisarivai tujuuluk nasartalik, jakke qernertoq, qarliit qernertut, skuut qernertut qaqortortallit aappaluttunillu aaqqateqartoq. Qaqortumik qalipaatilinnik seqinersiuteqarpoq kiinnanilu qungaseqummik qanermulluunniit assiaqummik aappaluttumik assersimavaa. Savimmik sakkoqarpoq.
  • Angut 15-it 20-llu akornanni ukiulik qaamasumillu amilik. Taanna 165-170 cm-it missaannik angissuseqarpoq, timaa nalinginnaasoq, qaamasumik amilik kalaallisullu oqaluttoq. Qernertumik nasartalimmik jakkeqarpoq, qarliit qernertut, skuut qaqortut kiisalu aaqqateqarluni aappaluttumik qernertumillu qalipaasilinnik. Qernertunik seqinersiuteqarpoq qanermullu assiaqummik tungujortuusumik kiinnani assersimallugu. Taanna aamma savimmik sakkoqarpoq.

- Politiit ujajaaniartoqarsimanera ilungersunartutut isigaat, taamaammallu inuit ujajaaniart kikkuunerannik ilisimannissinnaasut qinnuigineqarput politiinut ingerlaannartumik saaffiginneqqullugit. Tamanna aamma takunnissimasinnaasut, ujajaaniartoqanngilaattaani, ujajaaniarnerup nalaani kingornaluunniit takunnissimasinnaasunut atuuppoq, politiit tusagassiorfinnut nalunaaruteqarlutik oqarput.

Inuit ujajaaniartoqarnerani pisiniarfimmiissimasut aamma politiinut saaffiginneqquneqarput, suliamut atatillugu paasissutissaateqarsinnaammata. Politiit 701448-mut sianerfigineqarsinnaapput.

Overvågningsbillede
Kalaallit Nunaanni Politiit
Meeqqat Aqqalummiit angerlartinneqarput – aqagulu Illumut nuutsinneqassallutik

Nuummi sarfaaruttoqarnerata kingorna atuarnerup kingorna ornittakkami Aqqalummi ulluni marlunni sarfaqaranilu imeqarsimanngilaq. Taamaammat meeqqat Aqqalummiit angerlartiinnarneqarput. Aqqalummut...

Mailikkut nalunaaruteqartarfik ajorpoq – ima saaffiginnissaatit

Meeqqat inuusuttullu atugarliornerannik nalunaaruteqartarfik meeqqavut@sermersooq.gl...

OQALLIFFIMMUT TIKILLUARIT

Forsiden lige nu

Seneste Ugeavis

SENESTE NUUK - NYHEDER