Politiit: Nukappiaqqat tammaaneqartut qanoq innerat ernumassutigaarput

Ujaasineq imaatigut aamma silaannakkut qulimiguulimmik ingerlanneqarpoq.

Saaffiginnittoqanngitsoq
- Nukappiaqqat pillugit ajoraluartumik innuttaasunit saaffigineqanngilagut, taamaammat suli tamaviaarluta ujaasinerput ingerlapparput, Nuummi politiineersoq, Mads Lynge, ilisimatitsivoq.

Nukappiaqqat 16-inik ukiullit Kapisillit eqqaani aasaanerani tammaarsimaarfimmit qimaapput. Piffissami tassani siallertorujussuuvoq, politiillu qanoq innerannik ernumassuteqarput. Marlunngormat aatsaat siallerunnaarpoq.

- Silap taamaannikuuneranik soorunami qanoq innerannik, arlaannik pisoqarsimaneranik ernumassuteqarpugut, Mads Lynge oqarpoq.

Nuummiit 100 kilometerit
Aasaanerani tammaarsimaarfik Nuummiit 100 kilometerisut ungasitsigisumi inissisimavoq, politiineersoq ilisimatitsivoq, taamaattumillu ujaasiffiusoq annertunerarlugu naqissusiivoq.

Aamma atuaruk: 16-inik ukiullit marluk tammaarsimaarnerup nalaani periarfeerunneqartut

- Ujaasineq ullormiit ullormut nalilersuiffigineqarpoq. Ullumikkut ajunngitsut nassaarineqarnissaat soorunami neriuutigaarput, Mads Lynge oqarpoq.

Ujaarineqartut
Ulluni marlunni tulliuttuni nukappiaqqat nassaarineqanngippata weekendimi neriuutissaqarpoq, Nuummi innuttaasorpassuit angalaarlutik imaluunniit piniariarlutik sumiiffinni taakkunaniittarput. Tamatuma nukappiaqqat nassaarineqarnissaannut periarfissat annertusissavaa.

Pineqartut tassaapput Invar Sanimuinnaq Didomik taaneqartartoq, qernertumik qaatigooqarpoq, tungujortumik taartumik kiateqarpoq qorsorasaanik sakkutuut qarliinik atorluni. Aamma Nuka Sethsen, tungujortuugunartunik qalleqarpoq.

Politiit paasissutissat pissarsiarisimasaat naapertorlugit taakku oqarasuaatinik angallattakkanik nassataqarsimanngillat.

Politiit attaveqarfigikkit
Nukappissanik marlunnik takunnissimasinnaasut angalaarnerminniluunniit ikisisimasiinnaasut Nuummi politiit tusarfigerusuppaat. Nuummi politiit oqarusuaat 70 14 48 sianerfigalugu attavigineqarsinnaapput.