Politiit Narsami aallaasersorneq pillugu: Pinerluuteqartoq inunnut aalajangersimanngitsunut eqqarpoq
Kalaallit Nunaanni Politiit sisamanngornermi ualikkut ilisimatitsipput, pingasunngornermi aallaasersortoqarnerani Narsami sumiiffinni arlalinni pinerluuteqartoq eqqarsimasoq, inuillu nalaatsornerinnakkut takusani eqqorsimavai.
Angutip ulluni 28-ni tigummigallarneqarnissaa pillugu paasissutissanik nutarterneqarpoq.
Sisamanngornermi tusagassiortunik katersortitsinermi sivikitsumi Kalaallit Nunaanni Politiini vicepolitiinspektøri Lars Bjerregaard ilisimatitsivoq, Narsami pingasunngornermi aallaasersorneq, pinerluuteqartup heliportimut apuutinnginnerani aallartissimasoq.
- Pinerluuteqartup illoqarfimmi inissiat aalajangersimasuunngitsut eqqarfigilerpai, tamatumalu kingorna heliportiliarpoq, tassanilu qulimiguullip milersup tungaanut igippoq.
Angut 20-nik ukiulik vicepolitiinspektørip oqarnera naapertorlugu illoqarfimmeersuuvoq, taanna sisamanngornermi ualikkut matoqqasumik tunngaviusumik killisiorneqarpoq.
Angut ulluni 28-ni tigummigallarneqarpoq.
Eqqugaasunut attuumassuteqanngitsoq
Innuttaasut pisumit assiuteqarunik videoliaqarunilluunniit politiinut attaviginninnissaat Lars Bjerregaardip kaammattuutigaa, taakku suliap paasiniaaffiginerani atortussatut pingaaruteqarsinnaammata.
- Narsami amerlasuujulluta suliaqarpugut, pisorlu tamaat aallaasersorneq sioqqullugu kingornalu pisut qulaajarniarlugit sulivugut.
Politiinspektørip oqarnera naapertorlugu aallaaneqartut marluk pinerluuteqartullu akornanni imminnut attuumassuteqanngillat.
- Angut inunnut aalajangersimanngitsunut kikkunnulluunniit aallaasersornera misigisaq sakkortoorujussuuvoq, kisianni Narsami innuttaasut ullumikkut toqqissisimannginnissamut pissutissaqanngillat, Lars Bjerregaard oqarpoq.