Politiit nakuusertunut arlalinnut ornigussimasut
Tallimanngornerup arfininngornerullu akornanni politiit sulianut arlalinnut ornigussimapput. Persuttaanerit arfineq-marluk orninneqarsimapput. Amerlagisassaapput, politikommissær Brian Thomsen oqaluttuarpoq, oqarlunilu persuttaanerit 164-it ukioq mannaannaq nalunaarutigineqareersimasut.
Kalaallit Nunaata Politiivi ulapingaatsiarsimapput, sapaatip akunneratalu naanerani suli ulapingaatsiarnissamik naatsorsuuteqarlutik.
Tallimanngornermi ualineranit arfininngornerup ullaatungaani politiit pisunut assigiinngitsunut 48-nut ornigussimapput.
- Suliat arlallit imigassartortoqarsimaneranut attuumassuteqarput. Angerlarsimaffimmi eqqissiviilliortitsinerit arlallit aamma orniguffigaagut. Maanna persuttaasoqarsimaneranut suliamik suliaqarpagut, arlallit aamma takuagut, politikommissær Brian Thomsen, Kalaallit Nunaata Politiivini pigaartut pisortaat, Sermitsiaq.AG-mut oqarpoq.
- Unnuap qeqqata missaaniit maannamut suliat persuttaasoqarneranut tunngasut arfineq-marluk pisimalerpagut. Agguaqatigiissikkaanni akunnerit marlukkaarlugit suliamik nutaamik tigusisarpugut, Sermitsiaq.AG-mut arfininngornerup ullaatungaani oqaluttuarpoq.
2021-mi persuttaanerit nalunaarutigineqartut arlallit
2021-mi ullut 44-t siulliit persuttaasoqarnerit katillugit 164-it politiinut nalunaarutigineqarsimapput.
- Oqarsinnaavunga amerlapput. Aamma persuttaasoqarsimatillugu suliat soorunami ukkataraagut. Suliat taama ittut nuna tamakkerlugu suliaraagut, Brian Thomsen oqarpoq.
Ukiortaamiit qaammatip aappaa avillugu persuttaasoqarsimaneranut nalunaarutiginninnerit 164-iusut ullormut agguaqatigiississagaanni ullormut persuttaasoqartarnerit sisamangajaapput.
Kalaallit Nunaata Politiivi persuttaasarnerup akiornissaanut siusinnerusukkut suliniuteqarsimapput. Persuttaanerit 106-it oktober 2019-imi politiinut nalunaarutigineqarput, taamatullu persuttaanerit 109-t november 2019-imi nalunaarutigineqarlutik.
