Politiit misissuisut: Ilulissani pasinarsinnaasumik nassaarneq
Ilulissani massakkut politiit ulapaarnerupput. Ikuallaaviup eqqaani pasinarsinnaasumik nassaartoqarnerata kingunerisaanik politiit sumiiffimmi annertunerusumi misissuileruttorput. Sumik nassaartoqarsimanersoq politiit oqaatigisinnaanngikkallarpaat.
Ilulissani ikuallaaviup eqqaani pasinartumik nassaartoqarsimasoq politiit pigaartuisa ippassaq arfininngornermi nalunaaqutaq 20.30 missaani nalunaarfigineqarput.
- Pinerluttoqarsimanissaa suli uppernarsarsinnaanngilarput. Ilulissani politiit ikuallaaviup eqqaa tamaat matunikuuaat misissuineq eqqissisimasumik ingerlanneqarniassammat. Nassaarineqartorlu qanoq annertutiginersoq paasineqarniassammat, politiit tusagassiuutinut nalunaarummi taama allapput.
Suna nassaarineqarsimanersoq Sermitsiaq.AG-ip paasiniaraluarpaa, vicepolitiinspektørilli Gideon Quitsip politiit suliaq pillugu annertunerusumik maanna oqaaseqarsinnaanngitsut naqissuserpaa. Kingusinnerusukkullu misissuineq pillugu politiit annertunerusumik avammut nalunaaruteqarumaartut tusagassiuutinut nalunaarumminni paasissutissiissutigaat.
- Ilulissani innuttaasunut ikuallaaviup eqqaani misissuisoqartoq paasissutissiissutiginiarlugu avammut nalunaaruteqarpugut. Innuttaasut qinnuigaagut misissuisoqarnerani ataqqinninnissaat, Gideon Quist Sermitsiaq.AG-imut oqarpoq.
Ilulissani innuttaasut politiit ikuallaaviup eqqaani ullumikkut ulapaarnerunerat malugisinnaassagaat politiit aamma oqaatigaat.
- Suliap suuneranik politiit annertunerusumik oqaaseqarfigisinnaanngilaat misissuineq suli ingerlanneqarmat.