Politiit mianersoqqusipput: Nittartakkatigut pinerlunniat sianigineqarlik

Nittartakkatigut aningaasanik atukkiussisartunik allaffigineqassaguit eqqarsarluaqqaarit.

Kalaallit Politiivi tamanna oqariartuutigaat.

- Tassani – inunnit nunanit allaneersunit – aningaasanik atorniarneq pillugu iluanaarnartunik ernialinnik ussassaarisoqarpoq, politiit Facebookikkut allapput.

Ussassaarutigineqartumi kiisalu unnerluutiginnittut pinerluttullu allaqatigiinneri malillugit aningaasanik atorniarnissaq neqeroorutigineqarpoq. Pinerluttut aningaaserivimmeersuunerarput unnerluutiginnittullu qinnuigineqarput aningaasanik atorniarunik Danmarkimeersumit kontonormumut ikiseqqaaqqullugit.

Nittartakkatigut atornerluineq

- Unnerluutiginnittullu aningaasanik ikisipput – ikisereerneratalu kingorna arlaleriarlutik qinnuigineqarput aningaasanik ikiseqqeqqullugit, taamaasillutik neriorsorneqarlutik aningaasat atorniagaat ikineqaliivittut. Unnerluutiginnittulli aningaasanik atorniakkaminnik tigusaqarnikuunngillat – aningaasallu pinerluttumut ikinikuusatik qanoq isioraluarunik tigoqqinnavianngilaat, politiit ilisimatitsipput

Kalaallit Nunaata Politiivi internetsikkut mailikkullu paasissutissanik atornerluineq pillugu unnerluutinik arlalinnik pisarput.

- Ajoraluartumilli kingusinaartumik tusagaqartarpugut. Aningaasat ikineqareersimappata arlaannik iliuuseqarnissaq politiinut ajornakusoortarpoq – aamma kontomut Qallunaat Nunaanniittumut ikisisimagaluaraanni. Ikisereersimagaanni aningaasat ikineqartut nunani allaniittumut ingerlateqqinneqakkajuttarput, nunanili allaneersoq Qallunaat Nunaanneersumik akilikkamik ikiorteqartarluni.

Taamaammat tamakku pillugit neqeroorfigitillutilluunniit ussassaarutinik takuguit eqqarsaqqaartoqarnissaa siunnersuutigineqarpoq.

Eqqarsarluaqqaartarit

- Neqeroorutigineqartoq ajunngippallaarsorigaanni tamanna ilimagineqartariaqarpoq.

Kiisalu inuttut allattorsimaffiitit arlaannilluunniit kontot pillugu paasissutissanik internetsikkut, emailikkut oqarasuaatikkulluunniit tunniussinngisaannarit, politiit nalunaarput.