Politiit Maniitsumi suliaqartut: Angut illumiit aallaasersortoq tigusarineqarsimavoq

Angut 60-ikkut allartilaanerannik ukiulik marlungormat ulaakkut politiinit tigusarineqarpoq, Manniitsumi illumiit aallaammik eqqarsimanini pissutigalugu. Ajoqusertoqarsimanngilaq.

Maniitsumi Politiit ippassaq unnukkut aqqanernut nalunaarfigineqarput, angut Maniitsumi illumiit aallaammik eqqartoq pillugu, Kalaallit Nunaanni Politiit tusagassiorfinnut nalunaaruteqarnerminni ilisimatitsipput.

Maniitsumi politiit ajortumik kinguneqartoqannginniassammat ornigutipallassimapput, Nuummit immikut ilinniagalimmit ikiorsiisussat, tassunga ilanngullugu isumaqatiginninniartussat tikinnissaasa tungaanut najuussimallutik.

Poliit Nuummit ikiuukkiartortut marlunngornermi ullaralaakkut tikipput. Taamalu angut illumini imminut mattussimasoq isumaqatiginninniarfigilerlugu.

Nalunaaqutaq 08.07 politiit suliatik naammassivaat. Angut politiinut imminut tunniuppoq, maannalu politiinit tigummigallarneqarluni, politiit ilisimatitsipput.

Politiinit nunap iluani angalanermi tuniluuttoqarsinnaanera eqqumaffigineqarsimavoq, politiillu suliaqarneranni tamanna eqqarsaatigalugu iliuuseqartoqarsimalluni, tusagassiorfinnut nalunaaruteqarnermi oqaatgineqarpoq.

Politiit aggersarneqarsimasut maanna Nuummut uterlutik ingerlaalereerput. Politiillu pisoq maanna misissuiffigigamikkut allanik ilisimatitsissutissaqannginnerarput, tusagassiorfinnut nalunaaruteqarnermi oqaatigineqarpoq.

Powered by Labrador CMS