Politiit kinguaassiuutitigut atornerluinerit pillugit suliani sukkanerusumik suliaqartalersut
Meeqqat kinguaassiuutitigut atornerlunneqarsimasut pillugit nalunaaruteqartoqaraangat politiit sukkanerusumik meeqqanik apersuisalersimapput
Meeraq kinguaassiuutitigut atornerlunneqarsimasoq nalunaarutigineqaraangat Kalaallit Nunaanni politiit meeqqamik sukkanerusumik apersuisalersimapput. KNR taamatut allappoq.
Kinguaassiuutitigut atornerluisimaneq pillugu suliani sullissinermi piffissaq atorneqartartoq sivisusarsimaqaaq. 2018-imi suliaq nalunaarutigineqaraangat, meeqqap video atorlugu apersorneqarnissaata tungaanut agguaqatigiissillugu ullut 106,7-it atorneqartarsimapput. Tassa meeqqat ilaannut tamanna suli sivisunerusinnaasarsimalluni.
Kinguaassiuutitigut atornerluisimanerit pillugit suliassat politiit siorna ukiup aallartilaarnerani sallerpaatilersimavaat. Tamatuma malitsigisaanik siorna piffissaq utaqqiffiusarsimasoq ukiup siulianut sanilliullugu ullunik 42-nik sivikinnerulersimavoq. Maanna agguaqatigiissillugu ullut 64,5-it atorneqartartut nalunaarusiami KNR-ip inatsisinik atuutsitsinermut ministeeriaqarfimmiit pissarsiarisimasaani takuneqarsinnaavoq.