Politiit kaammattuipput: Kinguaassiutitigut atornerluinerit nalunaarutigikkit - ikiussavatsigit
Kalaallit Nunaata Politiivisa suliniutertik "Kinguaassiutitigut atornerluinerit nalunaarutigikkit - ikiussavatsigit" ullumi saqqummersippaat. Suliniut atorlugu kinguaassiutitigut atornerluisimanerit politiinut qanoq nalunaarutigineqarsinnaanersut pillugit innuttaasut paasititsiniaaffigineqassapput.
Kinguaassiutitigut atornerluisimanerit nalunaarutigineqanngitsoortartut Kalaallit Nunaata Politiivisa ikilisikkusuppai.
Politiit paasititsiniaanertik taamaattumik saqqummersippaat, kinguaassiutitigut atornerluisimanerit politiinut nalunaarutigineqartarnissaat, kinguaassiutitigullu atornerluisimanerit paqumigineqartarnerat atorunnaarsikkusullugu.
- Kinguaassiutitigut atornerlunneqarsimasut akornanni nalunaarutiginnissimanngitsut amerlanissaat ilimagaarput. Taamaattumik paasititsiniut una suliaraarput, innuttaasut ilisimasaminnik politiinut nalunaaruteqartarnissaannik oqariartuuteqartumik, taamaaliornikkummi innuttaasut ikiorsinnaagatsigit. Taassuma saniatigut erseqqissarneqartariaqarpoq meeraq kinguaassiutitigut atornerlunneqarsimasoq qaqugukkulluunniit pisuutinneqanngisaannarmat, Kalaallit Nunaata Politiivini pinerluttulerinermi pinaveersaartitsisuni vicepolitiinspektør Viggo Johansen tusagassiutinut nalunaarummi oqarpoq.
Tasiilaq pillugu nalunaarusiaq
Kalaallit Nunaata Politiivisa Tasiilaq pillugu nalunaarusiaat septemberimi siorna saqqummereersorlu, suliniut paasititsiniutaatigisoq saqqummersinneqarpoq. Nalunaarusiami pineqartumi, Tasiilami kinguaassiutitigut atornerluisimanerit katillugit 191-it ukiuni 2014-miit 2018 ilanngullugu nalunaarutigineqartut, Kalaallit Nunaata Politiivinit tiguneqarsimapput. Kalaallit Nunaata Politiivisa nalunaarusiaminni ilanngullugu inerniliussaraat kinguaassiutitigut atornerluisoqarsimatillugu qanoq nalunaartoqarnissaa innuttaasunit ilisimaneqanngitsoq, pisullu ilarpassui nalunaarutigineqarneq ajortut.
Suliniut paasititsiniutaatigisoq, kalaallisut oqaatsini sumiorpaluutinut pingasunut nutserneqarsimasoq, uani ataani takusinnaavat.
Atuarfiit tamarmik pulaarneqassapput
Paasititsiniaaneq Kalaallit Nunaata Politiivisa Facebookiannit ingerlanneqarpoq, taamaattoq politiit kommunit suleqatigalugit atuarfiit tamaasa pulaassallugit pilersaarusiuleruttorpoq.
- Pingaaruteqarluinnarpoq paasititsiniut meeqqanit tamanit takuneqarlunilu paasineqarnissaa. Atuartut oqaloqatigissavagut paasitillugit kinguaassiutitigut atornerluisoqarsimatillugu nalunaarutiginninnissaq qanoq pingaaruteqartiginersoq pillugu. Meeqqat ikiorusuppagut, ikiuunnissatsinnulli pisariaqarpoq kinguaassiutitigut atornerluisoqarsimatillugu nalunaaruteqartoqartarnissaa, Viggo Johansen erseqqissaavoq.
Paasititsiniut meeqqanut inuusuttunullu sammineruvoq, aammali perorsaasunut, soorlu angajoqqaanut, ilaqutaasunut meeqqanilluunniit sullissisunut, meeqqat politiinut nalunaaruteqarniartillugit ikiuuttussanut oqariartuuteqarluni.
- Paasititsiniaanermi paqumiginnikkunnaartoqarnissaa neriuutigaarput, kinguaassiutitigut atornerluisarnerit nungutinniassagatsigit, Viggo Johansen oqarpoq, erseqqissarlugulu isiginnaagassiaq naatsoq tamanit takuneqarlunilu inuit nittartakkakkut attaveqatigiittarfiani siammarneqarnissaa kissaatigalugu.