Politiit kaammattuipput: Imeq, innaallagiaq kiassarnerlu sipaarlugit
Nuummi politiit innuttaasunnut kaammattuipput innaallagiamik, imermik kiassarnermillu sipaartoqassasoq. Nuummi innaallagiamik pilersuineq pilersuigallarnermit maanna ingerlanneqarpoq.
Nuup annerpaartaani innaallagiaqalereeraluartoq taamaattoq pissutsit suli ajalusoorartarsinnaapput. Innaallagiaqarnermi maanna pilersuigallarnermit ingerlanneqarpoq.
- Nuummi innaallagiaaruttoqarnerani imermik aamma kiassarnermik pilersuineq aamma eqqorneqarpoq. Taamaammat innaallagissamut atortut pisariaqavinngitsut maanna qaminngatikkallarneqartariaqarput, taamatullu imeq kiassarnerlu pisariaqarnerpaaginnaq atorneqarluni, politiit tusagassiorfinnut nalunaarutiminni ilisimatitsipput.
Utoqqaat sanngiinnerillu mianeralugit
Innaallagiamik, kiassarnermik imermillu sipaarnerup saniatigut inuiaqatigiinni utoqqaat sanngiinnerusullu pisariaqartitsilersinnaanerat politiinit eqqumaffigeqquneqarpoq.
- Utoqqaat innuttaasullu sanngiinnerusut kommunimit ikiortarianngussappata - innuttaasut innaallagiamik, imermik, kiassarnermillu suli pilersorneqalinngitsut aamma pineqarput - taava Kommuneqarfik Sermersuumut saaffiginnittoqarsinnaavoq. Tamanna pisinnaavoq kommunip allaffianut ornigulluni saaffiginninnikkut, imaluunniit kommunimut sianerluni +299 367281-imut, politiit allapput.
Pisariaqavitsillugu taamaallaat sianerneq interneternerlu
Oqarasuaatit attavii suli ajutooratarsinnaapput. Oqartussat aaqqiiniarlutik maanna suligasuarput, taakkulu innuttaasunut aamma kaammattuuteqarput:
- Oqarasuaatit attavii suli ajorseriarsinnaaneri eqqumaffigisigit. Oqartussat pinartunik maanna suliaqarput, innuttaasullu kaammattorneqarput pisariaqavitsillugu aatsaat sianertassasut internetimilluunniit atuissasut, politiit tusagassiorfinnut nalunaarutiminni allapput.