Juullip nalaa

Politiit: Juullip nalaani imatut ikuallattoornaveersaarit

Juulli qanilliartorpoq, pisarnertullu naneruutit arlaqartut angerlarsimaffinni ikumatinneqartassapput. Ikuallattuunnginnissamut aajuku politiinit siunnersuutit

Juullip nalaani ikuallattuunnginnissamut politiit maanna innuttaasunut siunnersuuteqarput, tassami ukiup taamaalinerani naneruutinik ikumatitsisoqarnerusarmat.

Siunnersuutit Københavnip qatserisartuinit tigulaagaapput.

Ikuallattoornissat ima pinngitsoortissinnaavat:

  • Inimit naneruutinik ikumasoqartillugu aninak. Qamittuaannakkit.
  • Juullimut pinnersaatini naneruutit nungungajallugit ikumatinnagit.
  • Naneruut ikumasoq igalaaq ammatillugu igalaap saanut ilinagit (anorip inneq saagunut imaluunniit ikuallajasut allanut supisinnaavaa ikuallatsillugulu)

Ikuallattoornissamut piareersimagit:

  • Imeq - ikuallattumik qamitsinissamut piareersimasuuteqartuaannarit (assersuutigalugu naasunut seqqartaat imaluunniit qattaq imermik immerlugu).
  • Qatserutit - sumiinneri eqqaamakkit, aamma qanoq atortarneraat.
  • Qimaaffissat - ikuallattoqartillugu illumit qanoq anissanerlusi oqaluuserisiuk.

Ikuallattoqartillugu eqqaamassavat:

  • Aniguit matut tamaasa matussagakkit
  • Inuit tamaasa illumit anisissagakkit
Powered by Labrador CMS