Politiit Ivaaqqami suliaq pillugu: Salliutinneqarpoq
Ivaaqqami najugalik arnaq inuusuttoq annertuumik innarluutilik tupaallaatigineqaqisumik meerartaarmat qaammatit marluk maanna qaangiussimalerput. Poltiit suliamik suli misissuipput.
Qaammatit marlungajaat matuma siornatigut arnaq 23-nik ukiulik annertuumik innarluutilik nukappiarannguamik meerartaarsimasoq tamanit ilisimaneqalerpoq.
Ivaaqqami sulisut ilaqutaasullu naartuneranik ilisimasaqanngitsut meerartaarsimavoq.
Taamanikkut Sermitsiaq.AG-mit ilisimatitsissutigineqarpoq, Qaqortumi politiit suliamik misissuillutik ulapputeqartut.
Suli misissuisoqartoq
Pinerluttoqarsimatillugu misissuisartoq Bent Hytholkm Jensen taamanikkut tusagassiorfimmut matumunnga oqarpoq, innarluutillip pineqartup kina pinerluuteqarsimanersoq oqaatigisinnaanngimmagu DNA uppernarsaatitut pingaaruteqarnerpaassasoq.
Suliassaq pinerluttoqarsimatillugu misissuisartup ajornanngitsumik naammassineqarsinnaasutut oqaatigisimavaa.
Politikommissæri Julie Senderovitz Bendtsen, innarliisoqarsimatillugu suliaqarfimmi pisortaasoq Sermitsiaq.AG-.mut ilisimatisivoq, suliaq suli salliutinneqarluartoq. Ilanngulluguli oqaatigaa:
- Suliaq suli misissuiffigineqarmat allanik oqaaseqarsinnaanngilagut.
