upalungaarsimanissamik nalunaarut
Politiit inuuttaasunut sillimaqqusisut: Piffinni arlalinni qarsutsinersuaqartoq
Politiit tusagassiuuteqarfiit qinnuigaat ima nalunaaruteqaqqullugit: Uummannap eqqaani kangerlunniittut qutsissumukaqquneqarput, sissamukartoqannginnissaalu kaammattuutigineqarluni.
Nalunaarut ilungersunartoq Kalaallit Nunaanni Politini senioranklagerimit, Liselotte Bøhmimit nassiunneqarpoq, taakku nunaqarfimmi Nuugaatsiami nalunaaqutaq 22.15 qarsitsineqarsuarneranik nalunaarummik tigusisimanertik uppernarsarpaat.
- Taamatuttaaq Uummannami Illorsuarnilu mallerujussuarsimasoq, politiit paasissutissiaraat, tusagassiuuteqarfiillu nalunaarut ingerlateqqissagaat politiinit kissaatigineqarpoq.
Qulimiguulik annaassiniartartoq Uummannamiit politiinik, peqqinnissaqarfimmiunik, sillimaniarnermillu sulisunik piffimmut ornigutsitisoqarpoq, piffimmilu ikiuutaasinnaasunik Kangerlussuarmiit allanik orniguttoqarnissaa sulissutigineqarluni.
Annaassiniarneq upalungaarsimanermik suliaqartunit peqqinnissaqarfimmilu sulisunit suliarineqartoq, politiit nalunaaruteqarput, akunnernilu tulliuttuni suliartortitat eqqissisimatinneqarnissaannik piumasaqarput.