Politiit imerniartarfiit sukateriffigaat
Nuummi imerniartarfinnik Kristinemutimik, Minimuttenimik aamma Tullemutimik ingerlatsisoq imigassamik aalakoornartortalimmik tuniniaasinnaanermut akuersissummik nutarterinissamik qinnuteqarpoq.
Nakuusertoqarpallaarlunilu pinerluttoqarpallaarpoq.
Politiinit tusarniaanermut taama akissuteqartoqarpoq.
Suliffeqarfimmut Kiffartuussivik Nuummi imerniartarfinnit pingasunit Kristinemut ("Mutten"), Minimutten aamma Tullemut imigassamik aalakoornartortalimmik tuniniaasinnaanermut qinnuteqarfigineqarnerata kingorna tamanna pivoq.
Kristian Balslev 1. august 2019-miillit taakku pingasut ingerlappai.
Nutaamilli oqariartuuteqartoqarpoq
Kristian Balslevip imerniartarfinni taakkunani suli immiaarartortoqarsinnaassappat, arlalitsigut sukaterisariaqarneranik politiit tusarniaanermut akissutaat kinguneqartitsivoq.
Siullermik Suliffeqarfimmut Kiffartuussiviup innersuussutigaa ukioq ataaseq taamaallaat tunniussisoqassasoq. Siornatigut ukiut pingasuusaraluartut. Kommuneqarfik Sermersuup pitsannguinernik takunnikkusunnera tunuliaqutigalugu tamanna pivoq.
Piffissap akuersissuteqarfiusup sukateriffigineqarnerata saniatigut Mutten, Minimutten aamma Tullemut, isersimasunut sinaakkutit toqqissisimanarnerunissaat siunertaralugu nutaanik arlalinnik piumasaqarfigineqarpoq.
Persuttaaniarnerit ininilu allani akornusersuinerit akerlilersorniarlugit unitsinniarlugillu matulerisoqarnissaq aaqqiagiinngitsunillu aaqqiinissaq imerniartarfinni ukkatarineqassaaq.
Tamanna assersuutigalugu matulerisunik ilinniartitsinikkut pissaaq.
Tamakkiinerusumik imigassaq pillugu politikki
Sumiiffimmi politiit tusarniaassummut akissuteqarnerminni uparuartugaat annertuumik pinerlunniartarneq ukkatarineqassaaq. Suliffeqarfimmut Kiffartuussivik naapertorlugu, politiit pinerlunniarneq pillugu sulinerannut iluaqutaasussamik filmiliuutinik nakkutigineqarnera politiinut takusassianngortinneqarneratigut pisinnaavoq.
Ukiumi pineqartumi nutaamik tamakkiinerusumillu imigassaq pillugu suliffeqarfik politikkiliussaaq. Ukioq manna tamanna pissaaq. Imigassamullu inatsisip qanoq malinneqarnissaa pillugu nassuiaammik suliaqartoqarnissaa aamma naatsorsuutigineqarpoq.
Suliffiup avatangiisai toqqissisimanartut pitsaasullu pillugit nassuiaat aamma suliarineqassaaq, kiisalu aaqqiagiinnginnerit persuttaanerillu suliffeqarfimmit qanoq pitsaaliorneqassasut isumagineqassasullu pillugit nassuiaasiortoqassalluni.