Politiit ikuallangaatsiartumik misissuiniarput
Nussuinermk assartuinermillu suliffeqarfiup Usisaatip qullersaqarfissaata ikuallangaatsiarnera qatserisartut unnuap-qeqqata missaani qamissimavaat. Politiit pingasunngornermi ikuallannermut suna pissutaanersoq misissorlugu aallartissavaat.
Unnukkut qulingiluat eqqaani ikuallalluni aallartikkami pujuliungaatsiarsimavoq, politiillu ikuallattup eqqaani najugaqartut isersimaannaqqusimavaat matutik ingalaatillu matoqqatillugit. Illorsuaq ikuallattoq maqitsisarfiup Nuuk Imiup eqqaaniippoq.
Qatserisartut biilii arlallit takkussimapput, illorsuarmilu gassit puullit kemikaliallu arlaqarmata ajornerpaamik pisoqarsinnaanera annilaanngatigineqarsimavoq, arlaannilli ajoqusertoqarsimanngitsoq unnuaq nalunaarutigineqarpoq.
Assiaqusersuijunnaartoqartoq
Ikuallannerata nalaani aqquserngit assiaqusersorneqarsimapput, Nuummili politiit ullaaq nalunaaqutaq 6.15 ilisimatitsipput, assiaqusersuijunnaartoqarmat sumiiffiup eqqaani sulisut tamarmik akornuteqaratik suliartorsinnaanngortut.
Usisaatip qullersaqarfissaa marlunnik illutaqarpoq, illumilu avannarlermi ikuallanneq aallartissimalluni, pigaartut pisortaat illup aappaa ikuallannermi ajoquserneqarsimanersoq pillugu oqarfigineqarsimanngitsoq ilisimatitsivoq.
Misissuisoqalersoq
- Ikuallalerneranut suna pissutaanersoq paasiniarlugu ullaaq manna misissuilluta aallartippugut, pigaartut pisortaat Sermitsiaq.AG-mut ilisimatitsivoq.
Nussuinermik assartuinermillu suliffeqarfimmut Usisaammut biilileriffiuteqartumut ikuallanneq ajoqusiingaatsiarpoq, pilersaarutaammat suliarineqartartut tamarmik illumi ataatsimi ingerlanneqartarnissaat.
2020-mi novembarip qaammataani nappaanersiortoqarpoq, sanaartornerlu 100 millioner koruuninik naleqassasoq missingerneqarsimalluni. MT Højgaard sanasutut siunnersortaallunilu sanaartortuuvoq, Ole Lindahls Tegnestuelu illussamik titartaasuusimalluni.
Unnuaq ikuallammat assit arlallit takukkit
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...