Politiit eqqissisimaarnerusimapput
Kalaallit Nunaata Politiivi ippassarli tatisimaneqarnerusimanngillat. Pigaartut pisortaat taama oqaluttuarpoq.
- Ippassarnit eqqissisimaarneruvugut, pigaartut pisortaat, Lars Even Sermitsiaq.AG-mut oqaluttuarpoq.
Politiilli pisunut assigiinngiiaartunut arfininngornerup unnuaani orniguttariaqarsimapput.
- Persuttaasoqarneranik nalunaarutiginninnerit marluk
- Aqqusinermi eqqissiviilliortitsinerit sisamat
- Angerlarsimaffimmi eqqissiviilliortitsinerit tallimat
- Aserorterinerit marluk
- Pisut amerlanersaat, pingaartumik persuttaanerit, Nuummi pisimapput. Sinneri nunap sinneranut agguataarluarsimapput, Lars Even nassuiaavoq.
Angerlarsimaffimmi aserorterineq
Aserorterisoqarneranik nalunaarutit marluk ulloq unnuarlu ataatsip ingerlanerani politiinut nalunaarutigineqarput. Ataaseq Maniitsumi ataaserlu Narsami.
- Angerlarsimaffimmi pigisanik aserorterisoqartoq nalunaarfigineqarpugut. Pisoq nalunaaqutaq 22.50 nalunaarutigineqarpoq. Pinerluttoq suli kinaassusersinngilarput, pigaartut pisortaat nassuiaavoq.
Narsami aserorterisoqarneranik nalunaaruteqartoqarpoq arfininngornerup unnuaani nalunaaqutaq 01.45. Pinerluttoq imigassartorsimalluni igalaamik aseruivoq. Pineqartoq suliami unnerluunneqarpoq.