Politiit Hans Egedep eqqaassutissaata serlersaarfigineqarsimanera suli paasiniaavigaat
Hans Egedep eqqaassutissaanik ukiup ataatsip matuma siorna qalipaammik kueraasimasut suli nassaarineqanngillat.
Hans Egedep eqqaassutissaa Nuummiittoq juunip 21-ani 2020-mi Inuiattut Ullorsiornissap unnuaani qalipaammik aappaluttumik qorsummillu kuerarneqarsimavoq, toqqavianullu tuluit oqaasiat »decolonize« allanneqarsimalluni, aviisi Sermitsiaq allappoq.
Ukiup ataatsip ingerlareernerani suliaq Kalaallit Nunaanni Politiinit suli paasiniaavigineqarpoq.
– Nuummi oqaluffiup eqqaani qattorngup qaavani Hans Egedep eqqaasssutissaanut atatillugu siorna inuiattut ullorsiornissap unnuaani pisimasunik paasiniaaneq suli ingerlanneqarpoq. Paasiniaanerlu pissutigalugu annerusumik oqaaseqarsinnanngilanga, unnerluussisut pisortaat Morten Nielsen Sermitsiamut oqarpoq.
Serlersaarfiginnittut tassa suli nassaarineqanngillat, kisianni serlersaartoqarnerata kingorna nipilersortartoq Aqqalu Berthelsen oqarpoq, eqqaassutissamik serlersaarfiginnittut sinnerlugit oqariartortuulluni.
– Serlersaarfiginninnermut toqqaannartumik akuunngilanga, kisianni inuit taamaaliortut nalunngilakka, Aqqalu Berthelsen nittartakkami aviisimut Sermitsiaq.AG-mut oqarpoq.
Taassuma oqariartuut tuluttut allassimasoq, serlersaartuninngaanneernerarneqartoq, ingerlateqqippaa. Oqariartuut nutserlugu ima nipeqarpoq:
- Nunasiaatilinnik nalliuttorsiutiginnittarnitta unitsinnissaanut piffissanngorpoq, aamma taarsiullugu pissusissamisoortumik pigisatta utertinnissaanut piffissanngorpoq. Eqqarsaatitta nunattalu nunasiaataajunnaarsarnissaannut piffissanngorpoq. Nunasiaatilik kinaluunniit Nuummi Hans Egedetut qaqqap qaavani inissisimasussaanngilaq. Oqaluttuarisaanerput pillugu ilumoortut ilinniartariaqarpavut.
Sermitsiap Kalaallit Nunaanni Politiinut apeqqutigisimavaa, Aqqalu Berthelsen, siorna Inuiattut Ullorsiornermi Finlandip avannarpasinnerpaartaani najugaqartoq, suliami killisiorneqarsimanersoq imaluunniit pasisaanersoq.
Kisianni politiit Sermitsiap apeqquterpassuinut itisiliisunik oqaaseqaatissaqanngillat.
Tamatuma akerlianik Aqqalu Berthelsen Sermitsiamut ullumikkut oqarpoq, piffissap ingerlanerani politiinit killisiorneqarsimanani, naak nammineq oqarnera naapertorlugu, serlersaarfiginnittut kinaassusaannik ilisimasaqaraluarluni.
Allaaserisaq tamaat uani Sermitsiami atuaruk: