Politiit coronamut atatillugu Aasianni akiligassiisimasut

Aasianni inuk ataaseq, Kalaallit Nunaannut tikinnermini covid 19-imut atatillugu mattusimasussaanermut malittarisassanik unioqqutitsisimanerminut sapaatip akunnerani matumani akiligassinneqarsimavoq. Politiit tusagassiorfinnut nalunaaruteqarnerminni ilisimatitsipput.

Akiligassiisoqarpoq, inuup pineqartup Danmarkimit tikinnerminiit Kalaallit Nunaannut Kalaallillu Nunaanniit angalanissamut piumasaqaatinik pingasoriarluni unioqqutitsisimanera pissutigalugu. Taamaammat akiligassiissut 3000 koruunit pingasoriaataannik annertussuseqarpoq, aningaasat taakku tikinnermi coronamut tunngatillugu malittarisassanik unioqqutitsinermi akiligassiissutigineqartarput.

Akiligassat annertussusissaat aalajangersarneqarsimapput, Danmarkimi covid-19-ip malitsigisaanik killilersuutinik unioqqutitsinermi akiligassiissutigineqartartut annertoqqataattut.

Innuttaasut nersualaarneqartut

Politimesterip Bjørn Tegner Bayip tassunga atatillugu innuttaasut amerlanersaasa malittarisassanik malinnittarnerat nersualaarpaa.

- Innuttaasut oqartussat killilersuutaannik malinnilluarsimanerannik nersualaarusuppakka. Kalaalit Nunaanni tuniluuttoqalersinnaanera pinngitsoortissagutsigut immitsinnut illersorniarluta ikioqatigiittariaqarpugut.

Politimesterip erseqqissaatigaa, oqartussat malittarisassatut aalajangiussimasaannik malinninnikkut aamma immitsinnut qanillivallaannginnissamik assatsigullu eqqiluisaarluarnissamik ileqquliussisimaneq pitsaasoq eqqaamasaraanni tamanna angusaqarfiunerpaassasoq.

- Kalaallit Nunaanni Politiinit upperaarput, covid-19-ip ajornartorsiortitsinera ataatsimoorluta isumagisinnaagipput, pisimasulli matuma takutippaa, malittarisassanik tamatsinnut illersuutaasussanik malinninngittoqartillugu qisuariarluta akiligassiinissamut piareeqqasugut, Bjørn Tegner Bay oqarpoq.