mianersoqqussut
Politiit: Biilip assakaasui katariaannaat, siku aamma perlerortut mianersuussigit
Biilip assakaasui katariaannanngorlugit qasukkarneqarsimasut, sikumi angallanneq aamma teriannissat akornanni perlerorneq Kujataani politiit ernummatigalugu innuttaasunut mianeresoqqussutinik pingasunik nassiussipput.
Biilinik piginnittut tamarmik ingerlannginnermi assakaasuminnik misissuinissaat kaammattuutigineqarpoq.
Asuliinnaanngitsoq
Inuit kinaassusersineqanngitsut biilit assakaasuisa møtrikkiinik katatsitsisaqattaarnerannik tamanna pissuteqarpoq, Kujataani Politeeqarfik taama ilisimatitsivoq.
Suliat taama ittut politiit asuliinnaanngitsutut isigaat, assakaasut katassimasut biilertumut inunnullu pisuinnarnut allanullu ulorianartorsiortitsisinnaanerat mianersoqqussutigaat.
Sikumi angallanneq
Qaqortumi Tasersuarmi angallattalersimanerat politiit ernumassutigaat. Siku suli saappoq, angallaffigissallugu ulorianarluni. Angajoqqaat aamma paaqqinnittarfiit meeqqanik oqaloqateqarnissaannik taamaammat politiit kaammattorpaat.
- Inersimasut allallu sikumi angallanneq mianersoqqussutigeqqullugu kaammattorpagut, inuup inuuneranik naleqarsinnaammat aamma annaassiniartartut ulorianartorsiortinneqarsinnaanerat pillugu, politiit tusagassiuutinut nalunaarummi allapput.
Siku angallaffigineqarsinnaanngorpat politiit tusagassiuutinut nalunaaruteqarniarput.
Perlerortut ernummatigineqartut
Mianersoqqussutit pingajuat teriannissanut tunngavoq, taakku illoqarfinni inoqarfiusunilu takuneqarsimapput, tamatumalu teriannissat akornanni perlerortoqartoq takussutissartaraa.
- Teriannissat maluginiaqqissaarsigit politiinullu nalunaaruteqarlusi, taakku toqunneqarnissaannik isumaginnissapput, politiit taama kajumissaaripput, qimmit qitsuillu perlerortarnermut akiuussutissamik kapineqarsimanissaa pituttortarnissaallu maluginiaqquaat.