Skip to main content

Politiit aningaasarsiaasa qaffaatissaannik immikkoortitsisoqarsimasoq

Danskit aningaasanut inatsisaanni 50 millioner koruunit Kalaallit Nunaanni inatsisinik atuutsitsinermut ukiut sisamat sinnerlugit atorneqartussat immikkoortinneqarsimapput. Kalaallit folketingimi ilaasortat marluusut aningaasat politiit parnaarussivinnilu sulisut aningaasarsiaasa qaffaatissaannut atorusuppaat.

Danskit aningaasanut inatsisaanni 49,2 millioner koruunit Kalaallit Nunaanni inatsisinik atuutsitsinerup nukittorsarneqarnissaanut, ukiut sisamat sinnerlugit atugassat immikkoortinneqarsimapput.

Kalaallit folketingimi ilaasortat marluk danskit kalaallillu politiivisa parnaarussivinnilu sulisuisa aningaasarsiatigut nikingassutaat aaqqiiffigeqqullugit sorsuuteqarsimanerisa malitsigisaannik aningaasat nassaarineqarput.

- Inatsisinik atuutsitsinermut ministeri isumaqatiginninniarnermi Socialdemokraatinilu ataatsimiinnerni arlaleriarlunga oqaloqatigisarsimavara, erseqqissaassutigalugulu Kalaallit Nunaanni politiit parnaarussivinnilu sulisut aningaasarsiatigut immikkoortinneqarneri unitsinneqartariaqartoq. Isumaqatiginninniarnerit ingerlateqqilerpavut, naalagaaffimmilu sulisut assigiimmik atugaqartinneqarnissaat sapinngisara tamaat anguniassavara, Aki-Matilda Høegh-Dam (S) oqarpoq.

49,2 millioner koruunit taakku sumorpiaq atorneqassanersut suli isumaqatigiissutigineqanngilaq. Aaja Chemnitz Larsenilli (IA) inatsisisinik atuutsitsinermut ministerimik Nick Hækkerupimik (Soc) isumaqatiginninnialeruni politiit parnaarussivinnilu sulisut aningaasarsiaasa qaffanneqarnissaat salliutinniarpaa.

- Aningaasanut inatsisissaq pillugu isumaqatiginninniarnerni aningaasarsiatigut isumaqatigiissutissat nalinginnaasumik isumaqatiginninniutigineqarneq ajormata, aningaasanik aningaasarsiat pitsanngorsaatissaannik immikkoortitseqqusilluni sorrsuuteqarneq tamaviaarnarsimavoq. Tamaviaarnitsinni angusaqarluarsimavugut, taanna oqarpoq.

- Piumasaqaatigaarput 49.2 millioner koruunit taakkua sumut atorneqassanersut kingusinnerpaamik januaarip aallaqqaataani isumaqatigiissutigineqareersimassasoq, taamaattoqanngippat kingumoortumik atuutsitsilernissaq isumaqatigiissutigineqarsinnaavoq.

Suliniutit ingerlatsinerullu imminnut akulerussuunneqarnerat

Atlantikup avannaamiuinut ukiumut 20 millioner koruunit immikkoortinneqartartut, ilaatigut nutaaliorluni, kulturimut tunngatillugu inuusuttunullu tunngatillugit suliniutinut atorneqartussatut immikkoortinneqarsimasut aallerfigineqarsimapput. Aaja Chemnitz Larsenip (IA) taakkunannga aningaasanik tigusisarneq siusinnerusukkut isornartorsiorsimavaa, suliniutinumi aningaasaliissutit ingerlatsinermut atorneqartarnerat kukkusuusoq isumaqarami.

- Aappaagu allaanerusumik pisoqassasoq neriorsorneqarpugut, tamanna naammagisimaarluinnarpara.

Kræfteqartunut ikiorsiissutissat

Inatsisinik atuutsitsinerup nukittorsarneqarnissaanut aningaasaliinerup saniatigut 2020-mi 1 million koruunit Danmarkimi kalaallit kræfteqartut pitsaanerusumik ikiorneqartarnissaannut immikkoortinneqarsimapput. Danmarkimi nammineq piumassutsiminnik napparsimasunik ikorfartuisartoorusuttut pikkorissartinneqarnissaannut aningaasat atorneqassapput.

- Kræfteqalersimalluni nalunaarfigineqarneq amerlasuutigut tarnikkut perulutsitsisarpoq, siunissami inuunermi atugassat suliarineqarfissaanni. Kræfteqalersoq kisimi pinnani, aammali angalanermi ingiaqatigisaq ilaqutaasuulluuunniit eqqorneqartarput. Inuppalaartumik oqaloqatiginninnikkut napparsimasup nammineq oqaatsini atorlugit ernummatigisani oqaluuserisinnaanngortarpai, Aki-Matilda Høegh Dam (S) oqarpoq.

- Aamma ICC-p nunani tamalaani suliaqarnissaanut 1 million koruunit immikkoortinneqarsimapput, tamanna pitsaalluinnartutut isumaqarfigaara, Aaja Chemnitz Larsen (IA) oqarpoq.

Suliassaqarfik alla aningaasaliiffigineqartoq tassaavoq, nutaaliornermi ilinniartitsinermilu Sisimiuni laboratooriamik pilersitsinisssaq, Arctic Circle FabLab-imik taaguuteqartussamik. Aningaasanut inatsit aqqutigalugu ukiut sisamat tulliuttut 3,3 milloner koruuninik aningaasaliisoqartassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER