Skip to main content

Politiit angallatit nutaat pillugit: Iluaqutaasussat ajoqutaasussanit amerlanerupput

Kalaallit Nunaanni Politiit angallatinut sukkasuulianut nutaanut tallimaasunut piumasaqaatissanik suli suliaqarput

Politiit angallataannit sisamaasunit pingasut sukkasuulianik katillugit tallimanik taarserneqarnerisigut iluaqutissat ajoqutaasussaninngarnit amerlanerupput, Kalaallit Nunaanni Politiit taamatut naliliipput.

Tamanna justitsministerip Nick Hækkerupip (Soc) Aki-Mathilda Høegh-Damimut (S) akissutaani takuneqarsinnaavoq. Siumumi politikkerip angallatit pingasut angallatinik mikinerusunik sukkanerusunillu taarserneqarnissaat isorilluinnarpaa.

Nick Hækkerup akissutissarsiniarluni Kalaallit Nunaanni Politiinit allakkiamik pissarsisimavoq, tassanilu takuneqarsinnaavoq, sukkanerusumik ingerlaarsinnaaneq ajoqutaasinnaasunit pitsaanerujussuusoq.

- Kalaallit Nunaanni Politiit Kalaallit Nunaanni angallataatiminnit sisamaasunit pingasut sukkasuulianik tallimanik taarsiiniarlutik aalajangernerminni pingaartissimavaat, angallatit atorneqarsinnaassusaat, tassunga ilanngullugu inuit inuunerannik amerlanerpaanik annaassisinnaaneq aamma ajornartorsiortoqarnerani nunaqarfinnut illoqarfinnullu sukkanerpaamik apuussinnaaneq eqqarsaatigineqarnissaat, Kalaallit Nunaanni Politiit allakkiaanni taamatut allassimasoqarpoq.

Ilanngullugu allassimavoq, sukkassuseq imaani nunaqarfimmiluunniit ataatsimi ajornartorsiortoqartillugu politiit ornigutipallannissaannut aalajangiisuulluinnartuusoq. Ilanngullugu pingaartilluinnarneqarpoq, politeeqatiti assersuutigalugu aallaasersortoqarnerani sukkasuumik ikioriartupallanneqarsinnaanerat.

Tamakkua saniatigut nutaanik angallataateqalernikkut angallammik ataatsimik Tasiilamiititsinissaq periarfissaqalersoq.

Siku maliillu

Peqatigitillugu allassimavoq, maanna angallatigisat angallatinut nutaanut sanilliullugit pisinnaasaqarnerunerat eqqumaffigilluinnarneqartoq.

- Politiit angallataannik taarsiinermut atatillugu ajoqutaasinnaasut ilagaat, angallatit sukkasuuliat mikisuunertik pissutigalugu mallertorsuarmi sikoqaqisumilu angalasinnaanerisa killeqarnerat.

- Kalaallit Nunaanni Politiit tassunga atatillugu erseqqissaatigaat, sikoqartillugu angallatit nutaat angalasinnaannginneranni maanna angallatigineqartut ujaasillunilu annaassiniarnermut qaqutigupilussuaq atorneqartariaqartartut.

Tamatuma saniatigut sikoqarpallaarnera mallerpallaarneraluunniit pissutigalugit angallatit nutaat angalasinnaanngippata, umiarsuarnik namminersortunit pigineqartunik attartortoqarsinnaavoq kiisalu Arktisk Kommandoå qulimiguuliutai, timmisartuutai angallataaluunniit attartorneqarsinnaallutik. Ullumikkut sulisussaaleqineq pissutigalugu angallat ataaseq ingerlanneqarpianngimmat, namminersortut umiarsuaataannik politiit akulikitsumik attartortareerput.

Kalitaqartarneq

Angallatit nutaat taakku maanna angallatigineqartutut kalitaqarsinnaassanngillat. Inuimmi inuunerannik uloriaqartorsiortoqanngippat politiit siullertut suliassarinngilaat umiarsuarnik angallatinillu kalinnissaq.

Politiit ukiuni sisamani kingullerni arfinileriarlutik kalitaqarsimapput, taakkunanngalu kalinneq ataaseq angallatit nutaat atorlugit pisinnaasimanavianngilaq. Pisumi tassani assartuineq taamaallaat pineqarpoq.

Angallatit nutaat qanoq pisinaasaqartigissanersut suli erseqqissumik aalajangerneqanngilaq.

- Piumasaqaatit immikkuualuttortassaani suliaqarneq suli ingerlavoq, taamaammat angallatit suliassanut taama ittunut suliaqarnissamut qanoq aaqqissuunneqassanersut oqaatigissallugu siusippallaaqaaq, justitsministerip akissutaani tamanna takuneqarsinnaavoq.

Sapaatip akunnerani 36-mi workshoppertitsisoqarsimavoq, tassani politiit angallatinilu inuttat angallatinut nutaanut taakkununnga tunngatillugit isummaminnik kissaatiminnillu tunniussipput.

Angallatit sisamat 40 fodimit 50 fodimut angitigissapput, taakkulu Qaqertumi, Nuummi, Ssisimiuni Aasiannilu angerlarsimaffeqartinneqassapput. Angallatit tallimaat 25 fodimit 30 fodimut angitigisussaq Tasiilami angerlarsimaffeqassaaq.

Angallatit sukkasuusiliat ukiortaami suliarinnittussarsiuunneqassapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER