Politiit angallataat Kimik Aasiannut tunniunneqartoq

Kitaani politiit angallatitaavisa nutaat, sukkasuuliaasut siullersaat tallimanngormat Aasianni atserneqarpoq. Kimik atsiunneqarluni. Aasiaat politeeqarfiata allaffiani assistenti Najaaraq Josefsen atsiisussatut toqqarneqarsimavoq, nassuiaatigineqarluni politiinit pinngitsoorneqarsinnaanngitsutut isigineqarnera.

Angallat pinartumik pisoqarnerani politiillu suliassaqarneranni illoqarfinnut nunaqarfinnullu qanittunut ornigunnissaannut ajornannginnerulersitsissaaq.

Kalaallit Nunaanni Politiit tusagassiorfinnut nalunaaruteqarlutik ilisimatitsipput.

Kalaallit Nunaanni Politiit katillugit angallatinik nutaanik tallimanik pitaartussaapput. Tunumi angallat siulleq Tasiilami juulip arfineq-aappaani atserneqarsimavoq.

- Kalaallit Nunaanni Politiinut pingaartumillu Aasianni Politeeqarfimmut ulloq immikkuullarissuuvoq, sukkasuulianik nutaarluinnarnillu politiit angallateqalernerisigut ullut nutaat atuutilermata. Angallat nutaaliaalluinnartunik atortoqarpoq, politiinullu aamma Kalaallit Nunaanni pissutsinut naleqqussarlugut immikkut sanaajusimalluni, Aasiaat politeeqarfiani politikommissæri Aqqalu Petersen atsiinermi oqarpoq.

Angallat ornigutipallassinnaasoq

- Aamma qularutiginngilarput, nunaqarfinni sumiiffinnilu allani pinaveersaartitsiniarluni suliaqarnissamut atatillugu angallat politiit ornigutipallannissaannut iluaqutaassasoq, taanna oqarpoq.

Angallat 49 foditut angissuseqarpoq, 25 knobimillu sukkassuseqarluni, pinartunillu suliaqartoqarniartillugu atorneqarsinnaalluni, ilaatigut piffissap sivikitsuaqqap ingerlanerani ujaasillunilu annaassiniartoqassatillugu. Inuttat saniatigut aqqaneq-marlunnik ilaasoqarsinnaavoq.

Angallat 16 tiimit atorlugit Nuummiit Aasiannukarsimavoq, juulillu 23-ani Aasiannut tikillun.