Politiit akiuussutissalertissimanermik misissuisimasut: Akiligassiisoqarsimanngilaq

Politiit arfininngormat unnukkut unnuakkullu akiuussutissalertissimanissamut piumasaqaateqarneq naapertorlugu arlaleriarlutik misissuisimapput.

Neriniartarfinnut imerniartarfinnulluunniit iserniaraanni tamakkiisumik akiuussutissalertissimanissamut piumasaqaatit malinneqarsimanersut politiit Nuummiunerusoq misissorsimavaat. Akiuussutissalertissimanngikkaanni coronamik tunillatsissimannginnermut uppernarsaat 48 tiiminik pisoqaanerunngitsoq takutinneqartussaavoq.

Innuttaasulli misissuiffigineqartut piumasaqaatinik malinnissimasut, pigaartut pisortaat oqaluttuarpoq:

- Misissuisimavugut, misissukkavulli tamarmik piumasaqaatinik malinnissimapput, Kalaallit Nunaanni Politiit pigaartuisa pisortaat Nuno Larsen Sermitsiaq.AG-mut oqarpoq.

Aalakoortorpassuit

Malittarisassat naapertorlugit politiit misissortussaavaat, inuit akiuussutissalertissimanersut misissortissimanersulluunniit, aamma assersuutigalugu neriniartarfinni imerniartarfinnilu sulisut misissuinissamut pisussaaffilerneqarsimanngillat.

Avannaani nutaanik malittarisassaqaleraluartoq aamma killilersuutit suli atuukkaluartut politiit suliassaqarsimaqaat:

- Qaammatip naanerani aningaasarsisoqarsimanera pissutigalugu aalakoortoqaalussimaqaaq, pigaartut pisortaat oqaluttuarpoq.

Powered by Labrador CMS