Politiinut unnuaq ulapaarfiusimanngilaq
Kalaallit Nunaanni politiit unnuaq eqqissisimanerupput sapaatip akunnerata siulianut sanilliullugu. Angerlarsimaffinni aqqusinernilu eqqissiviilliornerit, imminut toqunniarlutik sioorasaarisut annersaanerillu ataasiakkaat, pigaartut pisortaat Aqqalu Petersen oqaluttuarpoq.
Kalaallit Nunaanni politiit arfininngornerup ullaap tungaani unnuaq eqqissisimanarnerusimasoq oqaluttuaraat. Politiit imminut toqunniarlutik sioorasaarisunut, angerlarsimaffinni eqqissiviilliornernut aqqusinernilu eqqissiviilliornernut orniguttarsimagaluarlutik sapaatip akunnerata siulia eqqarsaatigalugu unnuaq eqqissisimanerususimasoq oqaatigaat.
- Unnuaq eqqissisimaneruvoq. Politiinut ulapaarfiunngilaq annertuunik annaasiniarnernilluunniit ornigutinngilagut, Aqqalu Petersen oqarpoq.
Sapaatip akunnerata siuliani politiit tallimanngornerup ualineraniit ulappuserlutik aallartipput.
Imminut toqunnissamik sioorasaarisut arfinillit, angerlarsimaffinni eqqissiviilliornerit tallimat aqqusingernilu eqqissiviilliornerit arfinillit politiiniit ilaatigut suliarineqarput. Ulapaarnerlu sapaatip akunnerata naanissaanut ingerlalluni.
Politiit ulapaarnerata saniatigut Naalakkersuisut Tasiilami imigassamik tuniniaaneq sassaalliinerlu matuaat. Angerlarsimaffimmiit immiaaqqanik tuniniaasut pingasut suliassanngortinneqarsimapput, aamma imminut toqunniarlutik siorasaarisut marluk orninneqartariaqarsimallutik. Tasiilami imigassamik tuniniaaneq sassaalliinerlu septembarip 17-ata tungaanut matoqqatinneqarallarpoq.
