inissiat
Politiinut tunniussinissamik noqqaasoqartillugu attartortut akiliisartut
Inimi attartortut 398-it akilinngitsuukkanik akiitsoqarneq pissutigalugu anisitaanissartik utaqqivaat. Inissiaatileqatigiiffik Inimiilli oqaatigineqarpoq ikitsuinnaat anisitaasartut
Inip paasissutissiissutigaa attartortut 398-it akilinngitsuukkanik akiitsoqarneq pissutigalugu anisitaanissaq maannakkorpiaq utaqqimmassuk. Kisitsisini pineqarput attartortut 394-it inissiani kommunimit aamma Namminersorlutik Oqartussanit pigineqartuni najugaqartut aammalu attartortut sisamat Illuutip inissiaataanni najugaqartut. Tamanna marlunngormat saqqummiunneqarmat aalassassimaarutigineqarpoq.
Anisitaasussatut inissisimasut akornanni 89-it Narsarmi najugaqartuupput.
Attartortulli 400-ngajaat tamaasa anisitaanissaat naatsorsuutigineqanngilaq.
Tamanna Inissiaatileqatigiiffiup Inip Namminersorlutik Oqartussanut nassiussani itisilerlugu oqaaseqarfigaa.
Anisitaasoqanngitsoq naak 162-t suliarineqaraluartut
- Attartortut amerlasuut akiligassatik piffissaq eqqorlugu akiliineq ajorput. Taamaattumik politiinut tunniunneqartarput Inimit akileeqqussutit akilinngikkaangassuk. Taamaattumik attartortut amerlasuut politiinut qaammatit tamaasa tunniunneqartarput.
- Politiinulli tunniunneqareeraangamik aatsaat iliuuseqartarput Inimullu akiligassatik akilertarlugit, Inissiaatileqatigiiffik Inip attaveqaqatigiinnermut pisortaa Else Løvstrøm Sermitsiaq.AG-mut nassuiaavoq.
Assersuutigalugu attartortut 162-t Narsami Inimit anisitaasussatut inissisimapput januaarimi 2013-mi. Politiinut tunniunneqareernermi kingorna attartortut tamarmik akiligassatik akilerpaat anisitaasoqarnanilu.
Assinganik attartortut 67-it taamatut inissinneqarput, tassani ineqartut aqqaneq marluk anisinneqarput januaarimi 2014-mi.
- Taamaattumik attartortut anisinneqartartut politiinut tunniunneqartunit ikinnerujussuusarput, Inip attaveqaqatigiinnermut pisortaa oqarpoq.
Nunatsinni attartortut 398-it akilinngitsuukkanik akiitsoqarneq pissutigalugu anisitaanissaq maannakkorpiaq utaqqivaat.