Politiinut tatiginninneq pitsaasoq
Politiinut tatiginninnew nuna tamakkerlugu, ataatsimut isigalugu suli qaffasippoq, nunalu tamakkerlugu isigigaanni annertuseriarsimalluni. Nunaqarfinnili toqqissisimaneq allatorluinnaq ingerlavoq.
Toqqissisimanerup annertussusaanik Epinionip misissuisimanerata takutippaa innuttaasut ataatsimut isigalugu Kalaallit Nunaata Politiviinut tatiginnilluartut. Politiinut tatiginninneq nuna tamaat isigalugu annertusiartorpoq.
Apeqqutit innuttaasunit 800-ngajannit akineqarsimapput. Taakkunannga 89,3 procentit akisimapput ikiorneqarnissamik pisariaqartitsilissagaluarunik tatigilluinnarlugu politiinit ikiorneqarnissartik. Kisitsi taanna 2018-imi 85 procentiuvoq.
- Politiinut tatiginninnerup annertunerulersimanera nuannaarutigaara. Kalaallit Nunaannilu toqqissisimanerup annertujuarnera nuannaarutigalugu, politimester Bjørn Tegner Bay oqarpoq.
Nunaqarfinni innuttaasut toqqissisimanngitsut
Misissuinerup takutippaa "najugaqarfiit politeeqarfeqartut" innuttaasuisa politiinut tatiginninnerat annertuneruleriartortoq. Taakkuupput nunatsinni najugaqarfiit politeeqarfeqartut, Nuuk ilanngunnagu, Kalaallit Nunaata Politiivi tusagassiorfinnut taama nalunaaruteqarput.
Misissuinerulli aamma takutippaa, nunaqarfinni innuttaasut 2018-imiit 2019-imut toqqissisimanerat appariaateqarsimasoq. Najukkani politeeqarfeqanngitsuni toqqissisimasutut misigisut 2018-imi 92 procentiusimasut, 2019-imi 86,8 procentiupput.
- Maluginiarparput nunaqarfinni toqqissisimasut ikileriaateqarsimasut. 2019-imili kommunefogedeqartitsiniarluta suliniuteqarluta aallartikkattali, kommunefogedinik arlalinnik atorfinitsitsereerpugut. Kalaallit Nunaanni najugaqarfiit arfineq-marluk suli kommunefogedeqanngillat, Bjørn Tegner Bay tusagassiorfinnut nalunaaruteqarluni oqarpoq.
Ersarinnerunissaq piumasaqaataavoq
Bjørn Tegner Bayip erseqqissarpaa Kalaallit Nunaanni politiit ersarinnerunissaat pingaaruteqartoq. Taamaammat suliani meeqqat inuusuttullu pineqartillugit videomik immiussilluni apersuinerit pinasuartumik pinissaat suliniutigineqarpoq.
Suliniutillu allat, politiit inuiaqatigiinni ersarinnerunerannik aamma kinguneqarput:
- Meeqqat atuarfiini pulaaqattaartarnitsinni ersarinnerulerpugut. Politiit maanna taamaaliorput, nalunaarutiginnittarnissamut suliniuteqarnitsinni meeqqat toqqarlugit oqaloqatigiartortaratsigit. Tulluusimaarpunga nunatsinni innuttaasut suliatsinnut tatiginnillutillu toqqissisimalluarmata, Bjørn Tegner Bay oqarpoq.