Nuummi inissiaqarfinni marlunni attartortut arlallit aningaasanik utertitsiffigineqartussanngorput, inigisaminnut sippuillutik akiliisarsimasut paasinarsimmat. Kommuneqarfik Sermersuup tamanna nassuerutigaa.

Inissiaqarfiit taakku marluk ineqarnermut suliamik taagorneqartumut ilaapput, tassani kommuni ingerlatseqatigiiffinnut namminersortunut inissianik attartorlutik sulisunut innuttaasunullu attartortitsivoq.

Inigisamut akiliutip annertussusaa arlaleriarlutik naleqquttuunerareerlugu, kommuni maanna allatut isumaqalerpoq, attartortut arfineq-pingasut kommuni aamma inissiaatileqatigiiffik Iserit politiinut nalunaarutigereeraat inigisamut akiliutit misissoqqippaat.

Kommuni inissiaatileqatigiiffillu attartornermut isumaqatigiissuteqarnermi paasissutissat arlallit ilisimatitsissutiginnginnerisigut peqquserluttuliorsimasinnaanerannik isumaqaramik, attartortut nalunaarutiginnipput.

Naatsorsuinermi kukkunerit

Nalunaarutiginninneq Sermitsiaq.AG-p sapaatip-akunnerata siuliani oqaluttuaraa, tassungalu atatillugu pasilliutit isornartorsiuinerillu pillugit Kommuneqarfik Sermersuumit oqaaseqartitsiniarluni. Kommuni politiinut nalunaarutiginninneq pillugu oqaaseqarumanngilaq, kisianni allagaqarluni akissuteqarnermi inissiaatileqatigiiffik Iserit suleqatigalugu inigisanut akiliutit misissorneqarsimasut ilisimatitsivoq, taakkulu qaffasippallaarput:

- Kommunip Iserit A/S peqatigalugu inissiami pineqartumi inigisamut akiliutit naatsorsorneqarnerini kukkusoqarsimasoq paasivaat, tamannalu attartortut inigisamut akiliutaasa annertuallaarnerinik kinguneqarsimavoq. Inissiaqarfimmi sanianiittumi assinganik akiliuteqarfiusartumi aamma taamaattoqarpoq.

- Attartortut eqqorneqartut maanna inigisaminnut akiliutaat apparneqassaaq, sippuillunilu akilerneqarsimasut utertinneqassapput. Inissiaqarfinni taakkunani attartortut Iserit A/S-imit piaarnerpaamik attavigineqassapput, Olafur Nielsen oqarpoq, taanna kommunimi Pilersaarusiornermut Misissueqqissaarnermullu Immikkoortoqarfimmi pisortaavoq.

Taakkunani inigisamut akiliut 15-init 20 procentinut apparneqassasoq, kommuni itisiliivoq.

Oqiliallallutillu ernumasut

Attartortut oqaaseqartartuat kinaassutsiminik isertuussiumasoq, kommunip suliami allatut isumaqalernera oqiliallaatigaa, kisianni aamma pissusilersornera ernumanartoqartippaa:

- Soorunami oqiliallaqaagut, kisianni aamma piffissami ukiut sisamaat avillugu qanoq sullinneqarsimanerput ernumanartoqartipparput. Naak saaffiginnittaraluarluta Kommuneqarfik Sermersuumi aamma Iserit-imi misiarneq, nikaginninneq aamma nipangiusimanninneq, ileqqorineqarsimanera uggoreqaarput. Kommunip ileqqoq taanna atorunnaassagaa neriuutigaarput.

- Inuinnaavugut, inuillu allat taamatut unammilligassaqarsimasinnaanerat ernumanartoqartipparput, assersuutigalugu inissiani 360-ini sinneruttuni taamatut aaqqiissuteqarfiusuni, oqaaseqartartoq oqarpoq.

Kommuneqarfik Sermersooq inissianik 400-t missaanniittunik ingerlatseqatigiiffinnut namminersortunut attartorsimaneranut, oqaaseqartartoq innersuussivoq.

Oqaaseqartartup kinaassusaa Sermitsiaq.AG-mit ilisimaneqarpoq, kommunillu kingullermik 19. december 2022 inigisamut akiliutip eqqortuuneranik attassiniarsimanera uppernarsaatissaqartillugu.

Tapiissutit qaffanneqassasut

Kommunip decembarimi inigisamut akiliutip annertussusaata naleqquttuunerarnerata saniatigut, inigisamut akiliutinut tapiissutit ukiumut procentinik marlunnik sisamanilluunniit apparneqarnissaat kommunip aamma nalunaarutigaa. Tamannalu inigisamut akiliutit qaffaqqinnerannik kinguneqartussaasoq.

Tassanili aamma allatut oqariartuuteqartoqalerpoq:

- Inissiani attartortitani inigisamut akiliut ukiut tamaasa 1-4 procentinik qaffattarpoq. Kommunip tamatuma kingorna inigisamut akiliummut tapiissut qaffattassavaat, taamaalilluni qaffaaneq attartortunut tutsinneqassanngimmat, Olafur Nielsen, Sermitsiaq.AG-mut allappoq.

Inissiaqarfimmi tassani pineqartumi kommunip inigisamut akiliutip affaata missaa ingerlatseqatigiiffimmut namminersortumut akilertareerpaa, inigisamullu akiliutit apparneqarneranni kommunip aaqqiissummi amigartoorutai amerliartussapput.