Politi: Inuit pingasut ujaarineqartut ajunngitsut nanineqarput
Kalaallit Nunaata Politiivi, Arktisk Kommando aamma Sisimiut qatserisartut suleqatigalugit inuit pingasut tammaaneqartut ujaaraat. Ajunngitsut nassaarineqarput.
Inuit pingasut, angut 61-inik ukiulik nukappiaqqallu marluk 13-inik aamma 17-inik ukiulik tammaaneqartut politiinut ippassaq unnukkut nalunaarutigineqarput.
Nalunaarutiginnittut naapertorlugit tammaaneqartut Kangerlussuarmiit Sisimiunut nunakkut pisuttarfik aqqutigalugu Sisimiut tungaanukarlutik tallimanngornermi tikinnissaat naatsorsuutigineqarsimavoq.
- Ulloq ataaseq naalarneqqaassalluta aalajangerpugut silaginnera pissutigalugu, aammalu paasigatsigu aqqut pisullugu ullunik qulingiluanik sivisussuseqarsinnaasartoq. Ippassaq ullut arfinilissaat pisoreersimapput. Ullaarli suli tikissimanngimmata aalajangerpugut ujaasineq aallartissallugu, Kalaallit Nunaata Politiivini pigaartut pisortaat, Julie Senderovitz Bendtsen Sermitsiaq.AG-mut oqaluttuarpoq.
SOS-iliortut
Kalaallit Nunaata Politiivi, Sisimiuni qatserisartut aamma Arktisk Kommando suleqatigiillutik ujaasisimasut, pigaartuni pisortaq oqaluttuarpoq. Sisimiuni qatserisartut ATV-nik ingerlallutik nunakkut ujaasipput, politiillu AKO-lu helikopterimik aamma challengerimik silaannakkut ujaasillutik.
- Nalunaaqutaq 12.55-inngortoq pilotimit kalerrinneqarpugut inuit pingasut ujaarineqartut ajunngitsut, qasusulli nassaarineqartut. Maanna Kangerlussuarmukaanneqarput, peqqinnissaqarfimmiillu misissorneqassallutik, Julie Senderovitz Bendtsen oqarpoq.
Tammaaneqartut nunami tape-q tungujortoq atorlugu SOS-imik angisuumik ilisarnaasiorsimapput. Taannalu ilisarnaat silaannarmit ujaasisunit takujuminarsimavoq. Inuit pingasut nassaarineqarput illuaqqap qaaniillutik qummut aalaterisut.
- Tammaaneqartut nersualaartariaqarpagut SOS-imik ilisarnaasiorsimammata. Taamaasillutik nassaariuminarnerupput, pigaartut pisortaat oqarpoq.
Suleqatigiilluarneq
Ujaasinissap aalajangerneqarneranit akunnerit sisamat qaangiuttullu ujaarineqartut nassaarineqarput Kangerlussuarmukaanneqarlutillu.
Kalaallit Nunaata Politiivinit Julie Senderovitz Bendtsen oqarpoq ujaasineq pilertortumik pisinnaasoq politiit, qatserisartut Arktisk Kommandollu suleqatigiilluarnerisigut.
- Pilersaarusiornermi paasitinneqareerpugut ATV-t sukkut ingerlasinnaanersut, silaannakkullu sumi ujaasisoqassanersoq. Taamaasillutik silaannakkut ujaasisut sukkut ujaasissanerlutik paasiaarpaat. Suleqatigiinneq pitsaalluinnarpoq, oqarpoq.