Politiinngorlaat: - 'Aqqusinermi suliaqartalernisssara' qilanaaraara

Politiitut ilinniartut tallimat Politiitut Ilinniarfimmi ilinniarnertik tallimanngornermi naammassillugu politiitut allagartassatik Nuummi Politeeqarfimmut aallugit iseramik tamarmik qungujulaqaat, Kalaallit Nunaanni Politiit tusagassiorfitsigut nalunaauteqarlutik allapput.

Politiinngorlaat ukiut pingajuat avillugu ilinniakkaminnik ingerlatsisimapput, tassani misissuisarneq pisunut orniguttarneq imminullu illersornissa inatsisilerinerlu ilinniarsimavaat.

- Eqqaamavara politiinngorniarluta Politeeqarfimmi misilitsileratta pissangallutalu annilaangasimalluta. Tamattami allanngueqataanissarput takorloorsimavarput. Ilinnialerattali nutaanik ilikkagaqarsimavutut inuttullu ineriartorsimalluta, aamma suleqatigiilluarsimaqaagut, politiinngorlaaq Siimuut Dahl oqalugiarami oqarpoq.

Ilinniartitsisoq Jesper Hirtsgaard aamma ilinniarnerminnik naammassisunut oqaaseqarpoq:

- Eqqaamallugu innuttaasut pillugit sullissisussaagassi, aamma innuttaasut tatiginninnerannik mianerinninnissarsi pingaaruteqarpoq. Paasinnissinnaanersi isumassuisinnaanersilu tamatigut takutittarisiuk - aamma pissaanermik atuinermi, Jesper Hirtsgaard oqarpoq.

Politiinngorlaaq Tasiilameersoq

Politiinngorlaat ilagaat Casper Andreasen Tasiilamersoq. Taassumalu politiinngorniaqatigisimasani maqaasissamaaraluarlugit, politiitut sulilernissani qilanaaraa:

- Politiitut ilinniarfimmi atuarluni nuanneqaaq, suliatigut inuttullu siuariaatigeqaara. Piffissaq ingerlapallakkami! Kisianni politiit biiliinik angalasalernissara, innuttaasunik naapitsinissara aammalu misilittagaqalernissara qilanaaraakka, taanna oqarpoq, nangillunilu:

- Soorunami klassimi ataatsimoortarnerput ilinniartitsisorpullu Jesper maqaasisussaavakka. Tamattali Nuummi suliaqarluta ingerlaqqittussaavugut, taamaammat qujanartumik ulluinnarni immitsinnut suli takusassuugut.

Januaarip aallaqqaataani politiinngorniat nutaat politiitut atorfeqalernissaminnut ilinniarlutik aallartissapput.