Politi: Imerniartarfimmi sakkortuunik ikiaroornartutortitsisoqarsimaneranut suliaq paasiniarparput
Nuummi Politiit ilinniarnertuunngorniartup sakkortuunik ikiaroornartutortitaasimanera pimooruppaat suliarlu paasiniaaffigalugu.
- Suliami misissugassatsinnik periarfissarpassuaqarpoq, suliarlu paasinialeruttorparput, Nuuk Politiimi allattoqarfimmi pisortaq, Line Mika Skov pingasunngornikkut ullaap tungaani ilisimatitsivoq.
Sermitsiaq.AG ippassaq allaaserisaqarpoq ilinniarnertuunngorniaq Nuummeersoq, sapaatip ullaassaani imerniartarfimmi Manhattanimiitillugu ilisimanngisaanik colatugaa ilisimaneqanngitsumik sakkortuumik ikiaroornartumik akuneqarpoq.
Sermitsiaq.AG-p ilisimatinneqarnera naapertorlugu suliaq Nuummi Politiinit unitsiinnarneqarpoq angut pinerlineqartoq ataasinngornermi killisiorneqareernerata kingorna, tamannali eqqunngitsoq, Kalaallit Nunaanni Politiini allattoqarfimmi pisortap, Line Mika Skovip ilisimatitsissutigaa.
- Suliaq unitsiinnarneqanngilluinnarpoq, Line Mika Skov Sermitsiaq.AG-mut ilisimatitsivoq.
Suliaq pimoorunneqarpoq
- Suliaq pimoorupparput paasiniaallutalu aallartereerpugut. Angut pineqartoq killisiorneqaqqissaaq, uppernarsaatinillu katersilereernikuuvugut, allattoqarfimmi pisortaq nassuiaavoq.
Anaanaasup paasigaluarpaa suliaq unitsiinnarneqartoq, soormita?
- Tamanna oqaaseqarfigiuminaatsippara, sulianili tamani immikkut nalilersuisarpugut ilumut suliap ingerlateqqinneqarsinnaanera nalilersorlugu. Paasiniaanerullu tamanna takutikkumaarpaa, Line Mika Skov oqarpoq.
- Pisoq pimoorullugu tiguarput, arlalinnillu periarfissaqarpugut susoqarsimaneranik paasiniaanissatsinnut. Nakkutilliilluni immiussat tigusinnaavagut. Pinerluttoqarsimatillugu paasiniaanermi pinngoqqaatinik misissuisinnaavugut. Aap, sakkussaqarluarpugut paasiniaanitsinni ingerlariaqqinnissatsinnut, ilisimatitsivoq.
Suliat sakkortuunik ikiaroornartunik tunngassuteqartut amerlanngitsut
Sermitsiaq.AG-p tusarfii naapertorlugit Nuummi napparsimmavik anguti aava hashimik imigassamilluunniit aalakoornartumik akoqarneranik misissuinissaminnut taamaallaat periarfissaqarsimapput, taamaammat maannamut ilisimaneqanngilaq ikiaroornartoq sorleq atorneqarsimanersoq.
- Soorunami uagut aamma paaserusupparput ikiaroornartoq sorliunersoq. Kalaallit Nunaanni ajunngilluinnartumik inissisimavugut, ikiaroornartummi sakkortuut takukulanngilagut. Amerlanertigut hashimik atornerluisut naammattoortarpagut, tassanilu DIH-mi sillimaniarnermi suliaqartut qulaajaanermi ikiorsinnaavaatigut. Naalagaaffiulli politiivisa pinngoqqaatinik misissuisitsisarnerat maanna periarfissarivarput, Line Mika Skov ilisimatitsivoq.
- Suliat taama ittut naammattuukulanngilagut. Suliarli taama ittoq ataasiinnaagaluarpalluunniit taava suliat taama ittut amerlavallaarput. Inuusuttut imerniartarfimmiissagunik imminnut paarissasut kaammattuutigivarput, Nuummi politiit ilisimatitsipput.
Siunnersuutit –paaralusi
Inuusuttut imigaasa ikiaroornartunik sakkortuunik akuneqannginnissaat pinngitsoortinniarlugu politiit ima iliornissamik kaammattuipput:
- Imikkatit alanngisaannakkit
- Nammineerlutit imigassarnik pisiniartarit, imaluunniit nammineerlutik imigassarnik aallertarit
- Ikinngutitit sianigikkit. Eqqumiitsumik pissusilersulerpata ikiortissarsiorit
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...