Politeeq arnaq: Kinguaassiuutitigut kannguttaatsuliorfigineqarsimavunga

Laila Thomassen Fleischer oqaluttuarpoq, sulinermini kinguaassiuutitigut innimiilliorfigineqarsimalluni

Politiit uniformiannik atuinerup angutit kinguaassiuutitigut innimiilliornissamut tunuarsimaartittarsimarpassinngilaat.

Laila Thomassen Fleischer ukiut 14-it angullugit politiitut sulisimasoq aamma 'politiitut inuinnartullu innarliisarnerpassuarnik, taakkununnga ilanngullugu kinguaassiuutitigut innarliisarnernut akiueqataasimasoq' oqaluttuarpoq, oqaluttuarni facebookikkut allassimavai, taakkunanngalu issuaasinnaanitsinnut akuersaarsimalluni.

- Inuit ikittuinnaat ilisimavaat, qungujulanerup politiillu uniformiata tunuatungaani arnaqarmat arlaleriaqaluni kinguaassiuutitigut kannguttaatsuliorfigineqarsimasumik, tassa uniformimik atuininni aamma ullaakkut arfineq-pingasuniit ualikkut sisamat tungannut sulininni tamanna pisarsimavoq, Laila allappoq.

- Arnat qulit taakku maanna kannguttaatsuliorfigineqarsimanermillu kingorna misigisimasannik misigissutsiminnillu oqaluttuarnerat ilisaralugu anngaanginnarsinnaavunga.

- Kannguttaatsuliortussinnut oqarsinnaanersi aamma inuiaqatigiinni eqqarsarluaqqaarani arnanut pssusilersortarneq eqqarsaatigalugu ataqqillugu taamaallaat oqaatigisinnaavara!

Arnat qulit taakku taperserai

Saqqummiussinermigut neriuutigaa, killiisamik malinnittut suli amerlanerulissasut.

- Saqqummiussininni allanit nalligineqarnissara angunianngilara, taamaatulli pissusilersortarnermut akerliulluni oqarsinnaaneq arnanullu taakkununnga qulinut tapersersuinera takutikkusuppara, kiisalu neriuutigalugu inuit allat saqqummernissaminnut innimiilliortunullu taamaalioqqusinnginnermik oqarsinnaanermut sapiissuseqalernissaat anguniarpara, tamannami Kalaallit Nunaanni ullut tamaasa pisarmat, Laila allappoq, peqatigitillugulu erseqqissaatigalugu angutit kinguaassiuutitigut kannguttaatsulioraangata immikkuualuttortaanik oqaluttuarusunngilaq.

Naalakkersuisut ataatsimiinneranni killissaq qaangerlugu pissusilersortarneq

IA-mi siulittaasuusimasoq Sara Olsvig saqqummiussamini aamma allappoq, kannguttaatsuliortarnerit kinguaassiuutinullu tunngasutigut pissusilersortarnerit inuiaqatigiinni ajornartorsiutaasut. Politikkeritulli misigisimasani matumani immikkut pingaartillugit qaqilerpai.

...nulugissugut, timivut angivallaartut nujagulluunniit qituppallaartut. Ilassarpassuaqaraluarput.

- Sapaatip akunnerini kingullerni tusagassiorfitsigut allaaserineqaqattaartutut, Inatsisartuni partiit allaffeqarfiini kinguaassiuutinut tunngasutigut pissusilersortarneq, arnanik asissuisarneq angutisunnersuarlu ilisarisinnaalluarpakka. Tamakku aamma atuuttarput ataatsimiititaliat ataatsimiinneranni, inersuarmi ataatsimiinnermi naalakkersuisullu ataatsimiinneranni. Ammasumik matoqqasumillu ataatsimiinnerni, Sara allappoq erseqqissaatigalugulu inuinnartut tamanna allagarisimallugu.

- Arnat uagut sunik tamanik tusartinneqartarsimavugut, iviangitsinnut tunngasuniit appanniartarnermut aalisarnermulluunniit tunngatillugi politikkimut, siutinngunartumik nipeqartartugut, aqutseriaaserput sakkortuallaartoq, aqutseriaaserput sakkukippallaartoq, nulugissuusugut, timivut angivallaartut nujagulluunniit qituppallaartut. Ilassarpassuaraluarput. Oqaaseqartarnerit pissusilersuutigisartakkallu politikkerit akornanni kisimi tusarsaaneq ajortut, inuiaqatigiinnili tamani atuuttut.

Angutit aalisarnermut tunngatillugu politikkimi ‘kisermaassisut’

UNICEF Danmarkimi maanna suliniutinut pisortaasup politikkeriungallarami arnanut asissuisarneq aallatut aamma misigisarsimavaa, tassa kinguaassiuutitigut innimiilliorfigitinerup saniatigut allatut misigisarsimavaa, arnanullu taamatut isiginneriaaseq 'ukiuni akullerni' pissusilersortarnermit tunngaveqartoq isumaqarluni.

- Tamanna toqqaannartumik toqqaannanngitsumillu pisinnaasarpoq. Aalisarnermut politikkimut imaluunnii appanniartarnerup aqunneqarnerajut akulerutissanngittunga pillugu oqaaseqartarnermikkut. Imaluunniit politikkeritut sulingaatsiartarneq tunngavigalugu anaanatut piginnaasakka apeqquserneqarsinnaasarput. Arlaannaataluunniit angut politikkeriuppat ataatatut piginnaasai apeqqusernavianngilai.

Sara Olsvigip aamma inuttut qanoq misigisarsimanermini immikkuualuttut iserfigerusunngilai.

Arnat taakku marluullutik isumaqarput, piffissanngortoq kinguaassiuutitigut innimiilliortarnerit arnanullu asissuisarnerit akerlilersorneqarnissaannut.

- Arnat angutillu naligiilernissaannut aqqutissaq suli takeqaaq, tamattali oqarnissamut sapiissuseqalerutta siumut ingerlalissaagut, Laila Thomassen Fleischer oqarpoq.

Powered by Labrador CMS