Poliiit isernissamut inerteqqutaat Kalaallit Nunaata isornartorsiorpaa

Inerteqqut pissutigalugu australiamiut ingerlatsiviat Ironbark aningaasatigut sakkortuumik tatineqarpoq. Svalbardimit timmisartumik angalasunik Station Nordimut isernissamut politiit inerteqqutaat naalakkersuisoqarfimmi pisortap isornartorsiorpaa.

Timmisartumik angalasunik Kalaallit Nunaata avannaani Station Nordimut pollitiit iseqqusiunnaarnerannut akerliuneq annertusiartorpoq.

Aviisi Sermitsiaq taama allappoq.

Kalaallit Nunaanni Namminersorlutik Oqartussat akerliusunut maanna ilanngupput. Namminersorlutik Oqartussat isumaqarput politiit norskit qeqertaataannit Svalbardimit Station Nordimut Kalaallit Nunaannullu angalasunik siorna iseqqusiunnaarnerat erloqinartumik ajoqusiissasoq.

Inerteqquteqarnermut tunuliaqutaavoq nunat allamiut Station Nordimut, mittarfittut isigineqanngitsumut, isernissaat Schengenimi malittarisassatut taaneqartut malillugit unioqqutitsinerummat. Svalbardimi Longyearbyenimi mittarfik Schengenimi mittarfittut akuerineqarsimanngilaq.

Siullermik Station Nordimi qallunaat-kalaallit ilisimatusarfianni Villum Research Stationimi pisortaq, professor Henrik Skov, nalunaarpoq politiit nunat allamiunik iseqqusiunnaarnerat isumaqatiginngilluinnarlugu.

Taassuma aalajangiineq kamaatigaa, tallimanngornermilu decembarip 21-anni Sermitsiami inerteqqut »sianiilliornertut« taallugu.

Namminersorlutik Oqartussani Svalbardimit Station Nordimut iseqqusiunnaarneq ernumanartinneqarlunilu isornartorsiorneqarpoq, tassuunakkut australiamiut Citronen Fjordimi aatsitassarsiornermik suliniutaat Ironbark Zinc, milliardilinnik akilik, sakkortuumik eqqorneqassasoq. Suliniummi ingerlatsinermi aningaasartuutit qaffariarujussuarsinnaapput.

Aatsitassanut Sulisartoqarnermullu Naalakkersuisoqarfimmi pisortap Jørgen T. Hammeken-Holmip aningaasatigut kinguneqaatissat taamatut isigai, tassa Ironbark siunissami Tunup Avannaani Station Nordimut Citronen Fjordimullu timmmisartuussisalissappat, Islandimi mittarfimmit assersuutigalugu Tunumi Nerlerit Inaat aqqusaarlugu.

– Iseqqusinnginnermik malittarisassaq ajornartorsiutaavoq. Tamanna Ironbarkimut ajornartorsiuterujussuuvoq. Ajornertorsiullu suli annertunerulerpoq siorna upernaakkut selskabi qallunaat oqartussaasuinut kinguneqanngitsumik qinnuteqaraluarmat 2018-imi aggustimi immikkut akuerineqarluni Svalbardimiit Station Nordimut aningaasaliisunik nunanit tamalaaneersunik marloriarluni timmisartuussinissaminut, naalakkersuisoqarfimmi pisortaq Jørgen T. Hammeken-Holm aviisimut Sermitsiamut oqarpoq.

Politiit isernissamut inerteqqutaat pillugu aviisimi Sermitsiami atuarnerusinnaavutit. Aviisi uani ataani pissarsiarisinnaavat.

Powered by Labrador CMS