Skip to main content

Polar Seafoood Greenland: Imarsiornermik ilinniarfik pingaarnersiuinermut ilanngunneqarli

Qineqqusaartoqaleraangat tusarneqartaannarpoq nunaqavissut aqumiut sulisorineqarnissaannik piumasaqarneq. Maanna partiit piumasaqaat taanna aningaasanut inatsisissami isumaqatigiissummut ilannguppaat. Minnerpaamik aqumiut 90 procentii nunaqavissuussapput, isumaqatigiissummi takuneqarsinnaavoq. - Iluatsissinnaassappat ilinniartitaanermut tassunga aningaasaliinerusoqartariaqarpoq, Bent Friis-Salling Polar Seafoodimeersoq oqarpoq.

Politikerit nangaassuteqaratik nunatsinni aalisartitseqatigiiffiit allallu imaatigut angalatitsiveqatigiiffiit isornartorsioqqajaasarpaat piumasaqarfigalugillu aqumiunik nunaqavissunik atorfinitsitsiumaataarunnaarlutik sulisoqartariaqalersut. Taamatullu pasilliuteqartoqartarnera pingaartumik Inatsisartunut qinersisoqassatillugu nipikinngitsumik suaartaatigineqartarpoq.

Maannali partiit aningaasanut inatsisissamut 2024-moortumut isumaqatigiissuteqarput "inuttalersuinermik nalunaarut, kilissaatini aqumiuni aqumiunut tunngatillugu nunaqavissunik sulisoqarnermik piumasaqaatinik maleruagassiuussisoq allanngortinneqassasoq, taamaalilluni maanna 60 procentimiit 90 procentimut qaffanneqarluni."

Maanna Polar Seafood nipangersimaannarumajunnaarpoq. Ingerlatseqatigiiffiup kissaatigaa Imarsiornermik Ilinniarfik tulleriaarisarnermi pingaartinneqarnerulissasoq minnerunngitsumillu inuussutissarsiummik ingerlatsisut politikerillu oqaloqatigiinnerulissasut:

- Procentimik aalajangersimasumik taasilluni inatsisitigut piumasaqarneq kisimi naammanngilaq. Taamak piumasaqaraanni aamma iliuuseqartoqartariaqarpoq, taamaammallu politikerit imminnut pisussaaffilertariaqarput Imarsiornermik Ilinniarfik pingaartinnerussallugu aammalu tulleriaarisarnerminni kingullikunut ilaatikkunnaassallugu, tassami ullumikkut aningaasanut inatsimmi takuneqarsinnaanngingajappoq, illuatungaanilu piviusoq tassaalluni aalisarnermik inuussutissarsiuteqarneq nunatsinni inuussutissarsiutit isaatitsissutaasut pingaarnersarigaat, Polar Seafoodimi pisortaq kilisaatilerinermilu akisussaasoq, Bent Friis-Salling Sermitsiaq.AG-mut taamak oqarpoq.

Imarsiornermik ilinniarfik nunatta karsianiit ukiumut 6,1 million koruuninik aningaasaliiffigineqartarpoq tamatumalu saniatigut ilinniarfik aningaasaliisussarsiortarpoq ilinniarfiup aningaasatigut ingerlanneqarnera qulakkeersinnaajumallugu. Nunatsinni aalisartitseqatigiiffissuit tamangajammik ilinniartitaanermut tassunga aningaasaliisarput, taakkunngalu ilaavoq Polar Seafood.

Aqumiut nunaqavissut atorfinitsikkusunneqaqisut

Polar Seafood ukiuni arlalissuanngortuni nammineerluni iliuuseqarnermigut aqumiut nunaqavissut amerliniassammata ilinniartitaanermik aallartitsinikuuvoq. Bent Friis-Salling ilisimatitsivoq ingerlatseqatigiiffiup Imarsiornermik ilinniarfik suleqatigalugu aqumiussatut aallartittut pingajussaat maanna ilinniarlutik ingerlasut isumagisimagitsik:

- Kissaatitta annersaraat nunaqavissunik sulisoqarnissarput, tamanna arlaannaataluunniit qularutigissanngilaa, tassami aqumiut nunaqavissut kissaatitsinnut ilaalluinnarput, taamaammallu qinnuteqartartut ingerlatseqatigiiffiup naleqartitaanut pingaartitsisut aammalu kilisaataatitsinnik ingerlatsinissaminnut aqutsinissaminnullu piginnaasaqartut tamarmik atorfinitsinneqartarput. Tamatumali saniatigut Polar Seafoodimiit aqumiussanik ilinniartitaanermik Imarsiornermik Ilinniarfik suleqatigalugu ingerlataqarpugut maannalu ilinniartoqatigiit pingajussaat maanna ilinniarlutik ingerlarsorput, Bent-Friis Salling nassuiaavoq.

Inuussutissarsiummik ingerlatsisut politikerillu oqaloqatigiinnerunissaat kissaatigineqarpoq

Bent Friis-Salling maannangaaq oqaaseqarsinnaannginnerarpoq inuttalersuinermut nalunaarutip sukateriffigineqarnissaanik piumasaqaat nalunaarutitigut aalajangiiffigineqarpat tamanna qanoq kinguneqassanersoq, taamaallaat qulequtanngorlugu nalunnginnamiuk aqumiut inuttat 60 procentimiit 90 procentimut partiinit qaffanniarneqartoq:

- Uagut oqaloqatigiinnissamut piareersimavugut, taamaattorli partiit piumasaqaammik saqqummiussinnginnerminni attaviginngilaatigut aamma tusarniaaffiginngilaatigut. Taamaattorli qulakkeerinneqataarusuppugut sapinngisamik annerpaamik nunaqavissunik aqumiunik sulisoqarnissatsinnut, aamma piareersimavugut Imarsiornermik Ilinniarfiup pingaarnersiuinermi siuarsarneqarnissaanut peqataassalluta, tassa iliuusereriikkatta qaavatigut aqumiut nunaqavissut amerlineqarnissaannik siunertaqarneq peqataaffigerusupparput, taamaammat qilanaarpunga politikerit taamatut piumasaqarnerminni piviusunngortitsinissamut qanoq pilersaaruteqarnersut sukumiinerusumik paasisaqarfiginissaanut. Polar Seafoodimiit ataatsimik ersarissumik kissaateqarpugut, ilinniartitaaneq taanna pingaartinneqarnerusariaqarpoq, aamma aningaasanut inatsimmi.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER