Polar Seafood: Pitsaalluinnartumik angusaqaqqittoq

Kalaallit Nunaanni namminersortut suliffeqarfiisa annersaanni, Polar Seafood, kaaviiaartitat 130 millioner koruuninik annikillisimangaluartut, akileraarutit suli peernagit 327 millioner koruuninik ukiumut angusaqartoqarsimavoq, 2018-imut sanilliullugu 20 millioner koruuninik annerusunik.

Polar Seafoodip 2019-imut naatsorsuutini saqqummiuteqammerpai, taakku takutippaat, suliffeqarfik - akigititat 2019-ip ingerlanerani apparsimagaluartut - aalisarnermit niueruteqarluarsinnaasimasoq.

Suliffeqarfiup taamaalilluni 270 millioner koruunit nammineq aningaasaatiminut ilanngussinnaanngorpai, nammineq aningaasaataasa 2 milliarder koruunit sukkasuumik angujartorpaat.

- 2019-imi ingerlalluarsimavugut, tamatumunnga siullertut pissutaavoq suliffeqarfissuup - miinnerunngitsumillu sulisutta - ukiup naatsorsuuteqarfiusup ingerlanerani unammmilligassaasimasut sukkasuumik eqaatsumillu iliuuseqartarsimanerat. Unammilligassaqarsimavugullu, siulersuisuni siulittaasoq Henrik Leth tusagassiorfinnut nalunaaruteqarnermi ilisimatitsivoq, nangillunilu:

Aalisakkat assigiinngitsut akiisa apparsimanerat

- Tunisassiatta pingaarnerit ilaasa akii apparsimapput, tamannali umiarsuamik pigisanillu nalilinnik 50 milloner koruuninik nalilinnik tunisaqarnitsinnit iluanaarutinit matussusersimavarput, taanna ilisimatitsivoq.

Polar Seafood, 2019-imut naatsorsuutit

2019-imi kisitsisit qitiusut - 2018-imi kisitsisit ungaluusamiipput

Ilanngaatissat ilanngaatigereerlugit kaaviiaartitat: 3.149 mio. kr. (3.279)

Akileraarutit peernagit angusat: 891 mio. kr. (881)

Ingerlatsinermi angusat: 331 mio. kr. (330)

Akileraarutit peernagit angusat: 327 mio. kr. (307)

Nammineq aningaasaatit: 1.937 mio. kr. (1.667)

Siulersuisuni siulittaasup erseqqissaatigaa, aatsaat taamak pingaaruteqartigisoq suliffeqarfiup patajaattuunissaa, tamatumalu coronap ukioq manna aalisarnermut unammillernarneranut Polar Seafood aningaasassaqartissagaa.

- Suliffeqarfittut nunarsuarmi qanoq kinguneqarumaarneranik siumut oqaatigineqarsinnaanngitsumik tuniluuttoqarnera susinnaanngilarput, akerlianilli unammillingassavut piareersimaffiginiarlugit nunani tamalaani ingerlataqarnerput nukittorsarniarlugu tamaviaarluta suliaqarsinnaavugut. Tassunga ilanngullugu aningaasarnerput patajaallisarneqassaaq, aningaasarsiornikkut arlaatigut ajornartorsiortoqalersinnaaneranut sapinngisatsinnik piareersimaniarluta, Henrik Leth oqarpoq.

Inuiaqatigiinnut akisussaaffeqarneq

Polar Seafoodimit erseqqissaassutigineqarpoq, suliffeqarfissuup inuiaqatigiinnut akisussaaffeqarnini ilisimaarigaa.

- Kalaallit Nunaanni namminersortut suliffeqarfiisa annersaattut, taamatut akisussaaffeqarnitta pitsanngorsaaffigineqartuarnissaata qitiutinnissaa. Tamanna tunngavigalugu, pissusissamisoortutut isigaarput, Kalaallit Nunanni inuiaqatigiit ineriartorteqqinneqarnissaannut akisussaaqataanissarput. Suliffissanik nutaanik pilersitseqataasarnerput aningaasaqarnikkullu siuariartortitseqataanerput ingerlatiinnassavarput, tusagassiorfinnut nalunaaruteqarnermi erseqqissaassutigineqarpoq.

Suliffeqarfiup akileraarutit A-t, isumalluutinut tunisinermilu akitsuutit, iluanaarutit akittuutaat ingerlatseqatigiiffiillu akileraarutaat aqqutigalugit pisortat aningaasaqarnerannut tapiissutigisimasai 323 millioner koruuninut naatsorsorneqarsimapput.

Powered by Labrador CMS