Polar Seafoodip Upernavik tiguaraa
Polar Seafoodip Upernavimmi aalisakkanut suliffissuaataa aalisartunit atorluarneqarpoq – tamannalu Royal Greenlandip tunisassiornerata appariarujussuarneranik kinguneqarpoq.
2019-imi Polar Seafood A/S-ip Upernavimmi aalisakkanut suliffissualiorneranut atatillugu, Upernavimmi Royal Greenlandip aalisakkanut suliffissuaateqarnera ernumanartutut isiginngikkini, suliffeqarfissuup Kalaallit Nunaani namminersortunit pigineqartup annersaani piginneqataasoq pisortaanerusorlu, Jens Salling oqarpoq.
Aviisi Sermitsiaq taama allappoq.
Aammali Upernavimmi nutaamik aalisakkanut suliffissualiornissamut pilersaarut taavani aalisartut ikinnguterpassuami akornanni annertuumik tikilluaqquneqarlunilu tapersersorneqartoq, Sallingip ilanngullugu taamani oqaatigaa.
Polar Seafoodillu aalisakkanut suliffissuaataa atoqqaarfissiorneqarneraniit ukiut marluk arfarlu missaat qaangiussimalertut, Kalaallit Nunaani aalisartoqarfiit annerpaartaasa ilaanni nutaamik aalisakkeriviliorsimaneq iluatsilluarsimasoq takuneqarsinnaalerpoq.
Tassami unammilleqatigiinnerup aqqani qaleralilerngusaallunilu aalisartulerngusaannerup sakkortuup kingunerisaanik, Upernavimmi Royal Greenlandip aalisakkanut sulilffissuaataani tunisassiorneq piffissami matumanerpiaq annertuumik kinguariarfiusimavoq.
Sikkorissoq
Ukioq manna aqutsiveqarfik Upernavimmi sumiiffinni tamani annerusumik minnerusumiluunniit sikuuvoq, tamatumalu kingunerisaanik umiatsiaaqqat angallatillu piffissap ilangaatsiarsuani aalisarsinnaasimanngillat.
Akerlianilli siku atorsaatillugu sikukkut qimussimik qamuteralannillu qaleralinniarneq killilimmik ingerlanneqarpoq. Sikuuneralu pissutaalluni aalisakkanut suliffissuarni tunisassiorneq annikinnerusimasoq, suliffeqarfiit unammilleqatigiittut pineqartut tamarmik oqaatigaat.