Polar Seafoodip tunisassiaatai russit sakkutuuinit isumagineqartut pillugit video takutinneqaqattaartoq
Polar Seafoodip tunisassiaatai russit sakkutuuinit biilinut ikiorarneqartut pillugit videoliaq eqqortuunersoq ingerlatseqatigiiffimmit qularutigineqarpoq. Siulersuisuni siulittaasup nassuerutigaa, Ruslandimi suliffissuaatiminni maannakkorpiaq susoqarnersoq nakkutigiuminaattoq.
Videomi tuluit nutaarsiassaqartitsiviaani The Sun-imit saqqummiunneqarsimasumi qulequtsiunneqarsimavoq’
”Donetsk-imi sakkutuut saassussinertik ingerlatiinnarpaat, sorsuttoqarneratalu unitsinneqarnissaanik neriuuteqartoqarnerani, takuneqarsinnaavoq russit sakkutuuisa karsit Polar Seafoofip ilisarnaataanik meqqillit biilimiit biilimut allamut nussoraat.
Videop suminngaanneersuunera
The Sun tuluit tusagassiorfiutigaat Tuluit Nunaanni, Skotlandimi Irlandimilu saqqummersinneqartartoq. Aviisi ullormut 2.614.725-nik saqqummersitsisartoq 7,6 miliuuninillu atuarneqartartoq Tuluit Nunaanni aviisinit annersaavoq, nunarsuarmilu tuluttut oqaasilinnut aviisit annersaasa tulleralugu kiisalu nunarsuarmi tamarmi aviisit annersaasa qulingiluaralukku.
Videomi takuneqarsinnaavoq allassimasoq, CGTN vie Reuters. CGTN tassaavoq Kinamiut Beijingimi tv-kkut nutaarsiassaqartitsiviat nunani tamalaani tuluttut oqaasilinnut nutaarsiassiisartoqer.
Video saqqummiunneqarmat, atuartartut arlallit "sooq Polar Seafood Ruslandip sorsunneranut tapersersuinersoq" paaserusullugu allagaqartarsimapput.
Tapersersuisoqanngitsorli, siulersuisuni siulittaasoq Henrik Leth Sermitsiaq.AG-mut erseqqissaassuteqarpoq.
Siulittaasup siullertut paaserusuppaa, video eqqortuunersoq.
- Isumaqarpugut assit uukapaatitsiniutaasut, aalisakkammi qerisut sorsuffimmi qamutinut sorsuutinut ikiorarneqarnerat isumaqanngilaq, Henrik Leth oqarpoq.
Aalisakkerivik tunisinnaanngikkaat
Siulittaasup nassuerutigaa, Ruslandimi aalisakkerivimmi Polar Seafoodimit 75 procentimik pigineqartumi tunisassiornerup nakkutigiuminaannera.
- Videomik taamatut ittumik saqqummertoqarnera soorunami nuannarinngilarput. Video eqqortuussappat erseqqissaatigissavara, russit sakkutuuinut tapersersuinissaq anguniagarinnginnatsigu. Akerlianik Ukrainemi suliffeqarfiuterput aqqutigalugu Ukrainemiut sakkutuui tapersersorniarlugit aalajangersimavugut.
Aviisimit Sermitsiamit sapaatip-akunnerani matumani allaaserineqarpoq, Polar Seafoodip Ruslandimi suliffeqarfimmi aktiaatini tuniuminaatsissimagai, pisiaqarusussinnaasunik nassaartoqarsinnaasimanngimmat.
Russimik pisortaaneqartoq
Polar Seafoodilu piginnittutut allaqqqagaluartoq, aalisakkerivimmik ingerlatsinermut sunniuteqangaatsiarneq ajortoq, Henrik Leth ilisimatitsivoq.
- Ullumikkut pissutsit taamatut inissisimatillugit aamma russimik pisortaaneqartillugu tunisassiornermik ajoraluartumik aqutsisinnaanngilagut. Suliffeqarfiuvoq Ruslandimi niuerfinnut tunisassiortartoq, siusinnerusukkut nioqqutissiassat maanngaanniit pissarsiarisarsimavaat, tamannali sorsunneq allartinneqarmat unitsissimavarput.