Polar Seafoodip Ruslandimi suliffeqarfiutini tunisinnaanngilaa
Nunatsinni aalisartitseqatigiiffissuup ingerlataminik tuniniaanini taamaatiinnaraa, siulersuisut siulittaasuata Henrik Lethip oqaatigaa. Tassa massakkumuugallartoq.
Polar Seafoodip Ruslandimi ingerlataminik suliffeqarfiutiminik Polar Seafood Russiamik tunisinissaminik pilersaaruteqartoq, ajornartorsiuteqalerpoq.
Aviisi Sermitsiaq taama allappoq.
- Ruslandimi ingerlatavut nalilersortuarpavut, piginnittuunitsinnut tunngasut ilanngullugit. Massakkulli tunisinissatsinnut periarfissanik takusaqarsinnaanngilagut.
Polar Seafoodip siulersuisuini siulittaasoq Henrik Leth Sermitsiamut mailikkut taama allappoq.
Nunatsinni aalisakkanik suliffissuit namminersortunit pigineqartut annersaata Polar Seafoodip, Rockwool aamma Ecco assigalugit Ruslandimiiginnarnissani aalajangiuppaa. Immameersunik suliffeqarfissuup Ruslandimi ingerlatani unitsippai, tassa unitsinnissaannut periarfissallit.
Unitsinneqarsinnaasut unitsinneqartut
Polar Seafood Russia suliffeqarfissuup 75 procentinik piginneqataaffigisaa suliffeqarfimmik poortuivimmik suliffissuarmillu ingerlatsisuuvoq. Polar Seafoodip Ruslandimi suliffeqarfiutaa aalisakkanik paarnanillu Ruslandimut suli tunisassiorpoq.
Piginneqataassutini sinneruttut 25 procentit Russimit pigineqarput. Taassuma Polar Seafood Russiamik aqutsineq ingerlatsinerlu isumagisarilerpai. Suliffeqarfissuup Polar Seafoodip taamaalilluni Polar Seafood Russiami pingaarnertut piginneqataassutini taamaatippai.
- Ruslandimi ingerlatavut unitsissinnaasavut unitsereerpavut. Taamaalilluni nioqqutissanik aningaasanilluunniit Polar Seafoodip suliffissuanit Ruslandimi suliffissuaatitsinnut ingerlaartoqarunnaareerpoq. Tamanna pivoq Russit sakkutuuisa Ukrainemut isaanerisa kinguninnguagut, siulersuisut siulittaasuat Henrik Leth oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: