Polar Seafoodip nammineq aningaasaatai 2 milliardinngortut

Nunarsuarmi niuerfinni akit appariartoraluartut coronamillu nappaalanersuaqaraluartoq, Polar Seafood siorna 230 millionit koruunit sinnerlugit sinneqartoorpoq.

Suliffeqarfik namminersortoq aalisarnermik ingerlataqartoq Polar Seafood Greenland A/S, nunarsuarmi issittup kinguppaannik tunisassiortut siuttuisa ilaat, 2 milliardit koruuninik nammineq aningaasaateqalerpoq. Aviisi Sermitsiaq taama allappoq.

Polar Seafood patajaatsumik sinneqartoorutinik angusaqartarnini ingerlatiinnarpaa. Ukiumi naatsorsuiffiusumi 2020-mi nunarsuarmi akit appariartoraluartut, Tuluit Nunaanni tunisinermik ajornartorsiorfiugaluartoq aamma coronamik nappaalanersuaqaraluartoq, suliffeqarfissuaq akileraannginnermi 233 millionit koruuninik sinneqartooruteqarpoq. Ingerlatseqatigiiffik taamaalilluni 2019-mit 90 millionit koruuninik ikinnerusunik isertitaqarpoq.

Polar Seafoodimi unammillernartut eqqarsaatigalugit, angusaq aqutsisut naammagisimaarpaat.

- 2020 ukioq Polar Seafoodimut ajornakusoorpoq. Kisianni sulisutta 1.100-t missaanniittut sulilluarlutillu tunniusimanerisigut ajornartoorneq maannamut qaangerluarparput. Suliffissuarmi arlalitsigut allannguinissamut piareersimanissamut aalajangiisinnaassuseqarnissamullu pisariaqartitsisoqarpoq, tamannalu pivoq. Sulisugut assut nersualaarusuppakka, siulersuisuni siulittaasoq Henrik Leth oqarpoq.

Kaaviiaartitat apparialaaginnartut

Polar Seafood Greenlandimi kaaviiaartitat siorna 66 millionit koruuninik katillugit 3.028.550 koruuninngorlutik appariarput. Nioqqutissanut toqqorsivik akiitsullu 2020-mi appariartinneqarput.

Polar Seafood suliffeqarfissuup suliaanut kaaviiaartitaanullu sanilliullugu qaffasissumik akiitsoqanngilaq. Ukiup naanerani akiitsut katillutik 544 millionit koruuniupput, taakkunannga 17 millionit koruunit akiitsut sivisuumik akilersorneqarnissaminnut killilikkat.

Læs mere i avisen Sermitsiaq, som du kan få adgang til her:

Powered by Labrador CMS